"Nur Otan" partıasynyń atqarýshy hatshysy Asqat Oralovtyń buıryǵymen "Nur Media" holdıńiniń bas dırektory qyzmetine Rýslan Álishev taǵaıyndaldy. Bul týraly partıanyń baspasóz qyzmeti habarlady.

Rýslan Álishev M.Qozybaev atyndaǵy Soltústik Qazaqstan memlekettik ýnıversıtetiniń jáne A.Myrzahmetov atyndaǵy Kókshetaý ýnıversıtetiniń túlegi.

Ol Soltústik Qazaqstan oblysyndaǵy jergilikti atqarýshy organdarda, Petropavl qalasy ishki saıasat bóliminiń mamany qyzmetinen bastap, basqarma basshysy, oblys ákiminiń orynbasaryna deıingi túrli laýazymdardy atqardy.

QR Aqparat jáne komýnıkasıalar mınıstrliginiń Aqparat komıteti tóraǵasynyń orynbasary bolyp istedi.

Eki jyldan astam "Nur Otan" partıasy Ortalyq apparatynyń saıası jumys departamentin basqardy.

2020 jyldyń mamyr aıynan bastap Qazaqstan Respýblıkasy Prezıdenti janyndaǵy "Ortalyq komýnıkasıalar qyzmeti" respýblıkalyq memlekettik mekemesiniń dırektory qyzmetin atqardy.

"Nur Media" holdıńi – Qazaqstannyń iri medıa kompanıalarynyń biri. 2008 jyly 25 qarashada "Nur Otan" partıasynyń bastamasymen qurylǵan. Búginde holdıńtiń kompanıalar tobyna "Astana" telearnasy, "Aiqyn", "Lıter", Túrkistan", "Qazaqstan Temirjolshysy" gazetteri, "NS" jáne "ORDA FM" radıosy kiredi.