Almatyda "Atyraý munaı óńdeý zaýyty" JSHS-nyń burynǵy dırektory Shýhrat Danbaı ustaldy. Bul týraly exk.kz saıty habarlady.
Saıtta jarıalanǵan aqparatqa súıensek, Atyraý munaı óńdeý zaýytynyń birneshe qyzmetkerine qatysty qylmystyq is qozǵalyp, zaýyttyń burynǵy dırektory Shýhrat Danbaı ustalǵan. Oǵan qylmystyq kodekstiń 189 baby 4-bóligi 2-tarmaǵy (asa iri mólsherde senip tapsyrylǵan jeke múlikti ıelený nemese talan-tarajǵa salý) boıynsha aıyp taǵylǵan.
Byltyr prezıdent Qasym-Jomart Toqaev Atyraý munaı óńdeý zaýyty qyrýar qarjyǵa jańǵyrtý jumystarynan ótse de, suıytylǵan gaz óndirýde jıi qıynshylyqtarǵa tap bolatynyn aıtyp, synaǵan bolatyn. Osydan keıin birneshe quqyq qorǵaý organdary zaýytta tekserý bastaǵan.
Tekserý barysynda zaýyt kredıtorlarǵa 600 mlrd teńge bereshek ekeni, al jyldyq tabysy qaryzdyń bir bóligin jabýǵa da jetpeıtini anyqtaldy. Qazir quqyq qorǵaý organdary tarapynan taǵy birneshe kúmándi is-áreket tekserilip jatyr.
Pikir qaldyrý