Qyrǵyzstan prokýratýrasy qańtar oqıǵasy kezinde ustalǵan qyrǵyzstandyq mýzykant Vıkram Rýzahýnovty azaptaý faktisi boıynsha is qozǵady, dep habarlady KazTAG saıty.

– Bishkektiń Lenın aýdanynyń prokýrory Qazaqstanda Vıkram Rýzahýnovty azaptaý faktisi boıynsha qylmystyq is qozǵady, – dep málimdedi mýzykanttyń advokaty Nurbek Toqtakýnov.

Onyń aıtýynsha, Qyrǵyzstan Konstıtýsıasynyń 51-baby 6-tarmaǵyna sáıkes memleket óz azamattaryn elden tys jerlerde de qorǵaıdy.

– Eger Qazaqstan bıligi Vıkramdy azaptaǵandardy jazalamasa, bizdiń bılik olardy taýyp, jazalaýy kerek. Biraq Qazaqstannyń sybaılas jemqorlyqqa qarsy agenttigi bul iske qatysty óz betinshe tekserý bastap ketkenin aıta ketken jón. Endi bári Qazaqstan men Qyrǵyzstan quqyq qorǵaý organdarynyń Kıshınev kelisim (Árbir ýaǵdalasýshy taraptardyń azamattary, sondaı-aq onyń aýmaǵynda turatyn basqa adamdar basqa ýaǵdalasýshy taraptardyń sottaryna, prokýratýrasyna, ishki ister organdaryna, qaýipsizdik organdaryna jáne quzyretine azamattyq, otbasylyq jáne qylmystyq ister jatatyn ózge de mekemelerine erkin jáne kedergisiz júginýge quqyly – red) aıasyndaǵy ózara is-qımylyna baılanysty, – dep aıtty Toqtakýnov.

Eske sala keteıik, 9 qańtarda "Qazaqstan" jáne "Habar 24" arnalary "Qazaqstandaǵy mıtıńke qatysqany úshin aqsha aldy" dep qyrǵyzstandyq azamatty kórsetken edi. Vıdeoda beti-aýzy kógergen azamat 1 qańtarda beıtanys adamdar telefon arqyly habarlasyp, mıtıńige qatysý úshin 90 myń teńge usynǵanyn, bılet ápergenin, páterge ornalastyrǵanyn aıtady. 

Kóp uzamaı qyrǵyzstandyq basylymdar Vıkram Rýzahýnov Qyrǵyzstanda belgili jaz mýzykanty ekenin, Qazaqstanǵa konsertke kelgenin jarysa jazdy. 

Qyrǵyzstannyń Syrtqy ister mınıstrligi oqıǵaǵa baılanysty tekseris júrgizip, Rýzahýnovqa polısıa zábir kórsetkenin málimdep, Qazaqstanǵa qarsylyq notasyn jarıalady.

10 aqpan kúni Vıkram Rýzahýnov áleýmettik jelidegi paraqshasynda Qazaqstannyń tergeý ızolátorynda azaptalǵanyn moıyndap, málimdeme jasady.