Saıasattanýshy, belsendi Sanjar Boqaev baspasóz jıynyn ótkizip, "Namys" dep atalatyn saıası partıa quratynyn jarıalady.
Saıasattanýshy "Namys" el jastaryna ıek artyp, adamı qundylyqty, adamı kapıtaldy basty orynǵa shyǵaratyn sıfrlyq partıa bolatynyn aıtady. Ol ataýdaǵy "sıfrlyq" sózin partıa jumysyn jastar kóptep otyratyn jelilik platformalar arqyly ilgeriletip, qandaıda bir máseleni ashyq ári elektrondyq formatta talqylaý nıetimen baılanystyrdy.
Sózinshe, partıa qurý týraly sheshimge kelýine elde bolyp jatqan jaǵdaılardy ózgertýge degen qulshynys pen kópshiliktiń suraýy sebep bolǵan.
Sanjar Boqaevty partıa qurýǵa shaqyrǵan adamdardyń jazbalary. Foto: Qamshy.kz
Partıa baǵdarlamasy 7 baǵyttan turady:
1. Ádil, táýelsiz, adal sot júıesin qurý;
2. Jemqorlyqqa ymyrasyz kúres jarıalaý;
3. Memleketti, qoǵamdy, jastardy damytý úshin mádenı revolúsıa jarıalaý;
4. Tolyq saıası transformasıa júrgizý (ádil, táýelsiz saılaý júıesin qurý, jańa partıalardy tirkeý, ózin ózi usyný quqyǵyn qaıtarý, parlament saılaýyn ótkizý, qala ákimderin saılaý);
5. Memlekettik apparat sanyn qysqartyp, tıimdiligin arttyrý;
6. Sapaly bilimmen, medısınamen qamtamasyz etý;
7. Jastarǵa arnalǵan zaýyttar (jumys oryndaryn) ashý;
Saıasattanýshy partıa tóraǵasy saılaý arqyly tańdalatynyn, tirkelip, parlamentke ótip jatsa, búdjet esebinen qarjylandyrýdan bas tartatynyn málim etti. Sondaı-aq kásipkerlerden de qarjy alý oıynda joq ekenin jetkizip, partıa onyń músheleriniń jarnasy negizinde ózin-ózi qarjylandyratynyn aıtty.
– Aıyna 100 teńge bizdi qoldaıtyndar úshin úlken tólem emes, ázirge óz qarjymdy jumsap jatyrmyn. Maǵan aqsha usynǵandar az bolmady, biraq men prınsıpti túrde ony almaımyn. Men tek halyqqa, jaqtastaryma senemin, – deıdi ol.
Sonymen qatar ol eldegi jemqorlyqty 3 jylda joıýǵa bolatyndaı jospary baryn atap ótti.
Saıasattanýshy ózine qoıylǵan saýaldarǵa jaýap bere otyryp, bıliktiń bolmasa, qandaıda bir klannyń saıası jobasy emes ekenin, memlekettik qyzmette mol tájirıbe jınap, ol jerdegi mehanızm ishteı qalaı jumys isteıtinin, ony ózgertý joldaryn biletinin aıtty.
Saıasattanýshy sondaı-aq qoldaýshylar bolyp jatsa, prezıdenttikke óz kandıdatýrasyn usynýǵa qarsy emestigin bildirdi.
Aldaǵy ýaqytta partıany tirkeý jumystaryn bastaıtynyn, onyń barysynda bılik tarapynan kedergi jasalyp jatsa, "túrli tosynsyıǵa toly ár qadamdy" oılastyryp qoıǵanyn málim etti.
Sanjar Boqaev 1982 jyly týǵan. Ál-Farabı atyndaǵy Qazaq ulttyq ýnıversıtetin, Reseı Federasıasy prezıdenti janyndaǵy memlekettik qyzmet akademıasyn bitirgen, AQSH-tyń Kolýmbıa ýnıversıtetinde tájirıbeden ótken.
Ár jyldary Almaty qalasy ishki saıasaty basqarmasy, jastar saıasaty basqarmasyna jetekshilik etken. Prezıdent janyndaǵy strategıalyq zertteýler ınstıtýtynda jumys istegen. "Nur Otan" partıasy Almaty fılıaly tóraǵasynyń orynbasary bolǵan.
QazTransGaz kompananıasy eks-basqarma tóraǵasy Qaırat Sháripbaevtyń, senat spıkeri bolyp turǵanda Darıǵa Nazarbaevanyń keńesshisi bolǵan.
Sońǵy jyldary memlekettik qyzmetten ketip, kásipkerlikpen, saıası belsendilikpen aınalysyp júr.
Pikir qaldyrý