Aqtóbe oblystyq drama teatrynda jazýshy Svetqalı Nurjannyń senarıi boıynsha Danıar Bazarqulov qoıǵan «Er Edige» spektakliniń premerasy ótti.

Etno-folklorlyq tarıhı drama Edige batyrdyń erligi men qazaq tarıhynyń jarqyn kezeńderi jaıynda baıandaıdy.

Aıta keteıik, bul Edige batyrdyń atyn shyǵarǵan alǵashqy spektákl. Onyń qoıylymy Altyn ordanyń 750 jyldyǵyna arnalǵan.

"Oqıǵa Toqtamystyń han ordasynda órbıdi. Toǵaıbek hanym, Toqtamys hannyń áıeli dalanyń eki arysy – Toqtamys han men Edige batyrdyń arasyn alaýyzdap, olar dushpanǵa aınalady. Spektáklde sondaı-aq, Altyn Ordanyń sońǵy, myzǵymas ámirshisi Ámir Temir men Edige batyrdyń qarym-qatynasy da aıtylady",- deıdi rejıser Danıar Bazarqulov.

Qoıylymdaǵy tarıhı oqıǵalar Edigeniń erligin zamandas aqyndardyń jyrlaýymen astasyp jatyr.

Kópten kútken tusaýkeserde oblys ákimi Ońdasyn Orazalın, sonymen qatar, spektákl avtory Svetqalı Nurjan, qurmetti qonaqtar, sonyń ishinde elimizdiń ózge óńirlerinen kelgender boldy.

Oblys ákimi Ońdasyn Orazalın tusaýkeserden keıin: "Búgin biz aıtýly oqıǵanyń kýási boldyq. Qoıylymnyń oqıǵa jelisi bizdiń tarıhı jadymyzdy oıatady. Edigeniń tarıhtaǵy orny men mańyzy áli kúnge deıin tolyq zerttelmegen. Sońǵy jyldary Aqtóbe oblysynda uly batyrdyń esimin jańǵyrtý jáne saqtaý baǵytynda aýqymdy jumystar atqaryldy, ıaǵnı halyqaralyq ǵylymı-tájirıbelik konferensıalar ótkizilip, eskertkish ornatyldy, "Er Edige - Noǵaıly dáýiriniń jyry" atty álbom jınaǵy tanystyryldy. Óńirde halyqtyń baı mádenı murasyn júıelendirý jáne ózektilendirý boıynsha aýqymdy jumystar jalǵasatyn bolady",- dep atap ótti.