Almaty qalasy polısıa departamenti İshki qaýipsizdik basqarmasy tanymal vaınerler Meıirjan Tórebaev, Meıirhan Shernıazov jáne Ázimjan Saıdbaevqa qatysty isti tergep jatyr, dep habarlady KazTAG aqparat agenttigi.

"Almaty polısıa departamenti bireýdiń aqshasyn aldap alǵan er adamdy ustaý faktisin rastaıdy. Qazir atalǵan faktini Almaty PD İQB tergeýde. İs qylmystyq kodekstiń 190-baby 2-bóligi (alaıaqtyq) boıynsha sotqa deıingi tergeýdiń biryńǵaı tiziliminde tirkelgen. Kúdikti ustalyp, sot sanksıasymen qamaýǵa alyndy. Sondaı-aq kúdiktiniń quqyq qorǵaý organdaryna eshqandaı qatysy joq ekenin eskertemiz" delingen habarlamada. 

Buǵan deıin áleýmettik jelide taralǵandaı, Mudaraba Capital jáne AstexKZ qarjy pıramıdalarynyń jumysyna baılanysty qozǵalǵan rezonanstyq qylmystyq is barysynda 4 aqpan kúni İİM Qaýipsizdik qyzmeti men Almaty qalalyq polısıa departamentiniń Kúzet qyzmeti mamandary Almatyda quzyrly organnyń eks-qyzmetkerin 10 mln teńge kóleminde para alý ústinde ustaǵan.

"Para iske qatysy bar adamdardyń birinen alynǵan. Qazirgi ýaqytta atalǵan faktiler boıynsha tergeý amaldary júrgizilýde. Osy oqıǵalarǵa baılanysty sońǵy 10 aıda atalǵan qarjy pıramıdalaryna qatysty qylmystyq isti tergegen jedel toptyń basshysy qyzmetinen shettetildi. Ustaý áreketinen keıin is tergeý tobynyń jańa basshysyna berildi. Sodan keıin tanymal blogerler Meıirjan Tórebaev pen Meıirhan Shernıazov zańdy túrde jábirlenýshi mártebesinen kúdikti mártebesine aýystyryldy" delingen habarlamada.

Eske sala keteıik, 10 aqpanda qazaqstandyq úsh belgili vaıner Meıirjan Tórebaev, Meıirjan Shernıazov, Azımjan Saıdbaev qarjy pıramıdasyna jetekshilik etti degen kúdikke ilingen. Keıin Tórebaev pen Shernıazov 1000 AEK mólsherinde (3 063 000 tenge) kepil ótep, bosatylǵan. Tergeý málimetteri boıynsha, vaınerler Mudarabah Capital qarjylyq pıramıdasyn jarnamalap qana qoımaı, sonymen birge onyń ıeleri retinde únemi tabys alyp otyrǵan. 11 aqpanda polısıa Saıdbaevty izdestirý jumystary bastalyp, ony syrttaı eki aıǵa qamaý týraly sheshim shyqqan.