Tirkelmegen Demokratıalyq partıanyń jetekshisi Janbolat Mamaı ákimshilik qamaýǵa alynǵandarǵa arnalǵan mekemede emes, Almaty qalalyq polısıa departamentiniń ýaqytsha ustaý ızolátorynda. Bul týraly saıasatkerdiń áıeli Inga Imanbaı áleýmettik jelidegi paraqshasynda málimdedi. 

– 13 aqpanda qańtardaǵy qaıǵyly oqıǵada qaza bolǵandardy eske alǵan mıtıńige qatysty Janbolat Mamaıǵa ákimshilik kodekstiń 488-bap 7-bólimi (beıbit jıyn tártibin buzý) boıynsha aıyp taǵyldy. Ózderińiz bilesizder mıtıńke 1000-nan astam adam qatysty. Biraq bizge Janbolat Mamaıdy jáne onyń jaqtastaryn ne úshin ustaǵandaryn túsindirmedi. Bul zańsyz, óreskel áreketter bizdiń ómirimizge qaýip tóndirip tur, – deıdi I. Imanbaı.

Belsendiniń áıeli Mamaı jáne onyń jaqtastaryn polısıa bólimine qalaı alyp ketkenderin aıtyp berdi.

– Bizdi kólikpen birge evakýatormen polısıa bólimine alyp ketti. Bizdi kim jáne ne úshin alyp bara jatqandaryn túsindirmesten, polısıa bólimine alyp ketti. Polısıa bólimine kelgen soń ǵana bizge Naýryzbaı aýdany prokýrorynyń orynbasary 13 aqpan kúni Qańtar qurbandaryna arnalǵan qaraly mıtıń úshin Janbolat Mamaıǵa qarsy ákimshilik hattama toltyrylǵanyn aıtty. Biz búginge deıin ustaýdyń túr-túrin kórdik. Biraq kólikti evakýatormen polısıa bólimine jetkizý degen birinshi ret, – dep atap ótti ol.

Inga Imanbaı qamaýdaǵy belsendi Dáýren Dostıarov densaýlyǵyna baılanysty 13 aqpandaǵy mıtıńke qatyspaǵanyn jetkizdi.

– Ózderińiz biletindeı, Dáýren Dostıarov qańtar oqıǵasynan keıin bir apta boıy azaptalyp, polısıaǵa qarsy qylmystyq is qozǵaldy. Ony polısıaǵa baǵynbaǵany úshin, bes táýlikke sottady. Kelesi kúni, senbi 26 qańtar kúni Janbolat Mamaıdyń taǵy bir jaqtasy Rysbek Toqtasyndy uryp-soǵyp, ony arnaıy mekemege emes Almaty qalalyq polısıa departamentiniń ýaqytsha ustaý ızolátorynda 15 táýlikke qamaýǵa aldy. Munyń bári eshnárseniń ózgermegenin, qańtar tragedıasy olarǵa sabaq bolmaǵanyn kórsetedi, – dedi ol.

Sondaı-aq saıasatkerdiń áıeli men jaqtastary QDP ókilderiniń ýaqytsha ustaý ızolátorynda ustalýyna narazylyqtaryn bildirdi.

– Almatyda ákimshilik qamaýǵa alynǵandarǵa arnalǵan arnaıy túrme bar. Biraq Janbolat Mamaı men Rysbek Toqtasyn qazir ol jerde emes, qańtardaǵy qaıǵyly oqıǵadan keıin ustalǵandar, aıaýsyz azaptalǵan Almaty qalalyq polısıa departamentiniń ýaqytsha ustaý ızolátorynda otyr. Dál osy Almaty qalalyq polısıa departamentinde Dáýren Dostıarovty azaptaǵan kezde, Mamaıǵa qarsy kýálik almaqshy bolǵan. Janbolatty ákimshilik qamaqqa aldyq deıdi, biraq ákimshilik qamaqqa arnalǵan túrmege emes, dál osy (Almaty qalalyq polısıa departamenti - red) túrmege alyp kelip, qamaıdy. Sondyqtan biz Janbolattyń ómirine, densaýlyǵyna, qaýipsizdigine qatty alańdaımyz, – dedi Inga Imanbaı áleýmettik jelidegi vıdeoúndeýinde.