Basqarma málimetinshe, qazaqstandyq kópsalaly qaıta qurý jáne damý ınstıtýty sarapshylary rezıdensıa "paıdalanýǵa shekteýli jaramdy"degen qorytyndy jasaǵan.

"Órttiń jáne asa joǵary temperatýranyń saldarynan barlyq tireýish qurylymdary men shatyrdyń negizi bolyp tabylatyn metal elementteri zaqymdalǵan. Ǵımarattyń saqtalǵan fragmentterinde ystyń ıisin tolyǵymen joıý múmkin emes. Sonymen qatar, búgingi tańda obektiniń qurylymdyq elementteriniń bir bóligi qoldanystaǵy qurylys normalary men erejelerine sáıkes kelmeıdi. Ǵımarattyń negizgi konstrýksıalaryn qalpyna keltirý jáne ony seısmıkalyq kúsheıtý úshin asa kapıtaldyq salymdardy talap etedi. Sarapshylardyń pikirinshe, Rezıdensıa ǵımaratyn qaıta jabdyqtap, ony paıdalaný qaýipsiz emes. Qazaqstan Respýblıkasynyń zańnamasyna saı osyndaı mártebesi bar obektilerge qatysty talap etiletin, Respýblıkalyq mańyzy bar tarıhı eskertkishti buzýǵa qatysty barlyq rásimder saqtala otyryp júzege asyrylatyn bolady" delingen basqarma túsindirmesinde.

2 naýryzda prezıdenttiń baspasóz hatshysy Berik Ýálı prezıdenttiń Almatydaǵy rezıdensıasy súrilip, ornyna saıabaq salynatynyn málim etken.

Áleýmettik jelide tarıhı ǵımaratty súrýge qarsy shyqqandar, ony túrli maqsatta paıdalanýǵa bolatynyn aıtqandar kóp bolǵan.