AQSH memlekettik hatshysy Entonı Blınken VVS-ge Ýkraına Reseımen soǵysta jeńetinine senimdi ekenin málimdedi.

Ol qaqtyǵystyń qansha ýaqytqa sozylatynyn dóp basyp aıtpady, biraq Ýkraına sózsiz jeńilmeıtinin jetkizdi.

Blınken sondaı-aq ýkraın halqynyń «erekshe tózimdiligin» joǵary baǵalady.

"Eger Máskeý qandaı da bir jolmen úkimetti qulatyp, óziniń qýyrshaq rejımin ornatýdy kózdeıtin bolsa, 45 mıllıon ýkraınalyq qazirgideı jolmen nemese basqa jolmen bas tartady" dedi ol.

"Soǵys Reseı prezıdenti Vladımır Pýtın josparlaǵandaı bolǵan joq" dep qosty ol.

Ýkraına kúshteri Reseıdiń basqynshylǵyna qýatty qarsylyq kórsetip jatyr. Soǵys toǵyzynshy kúnge jalǵasýda.

Ońtústikte orys áskerleri Qara teńiz jaǵalaýyndaǵy aýdandardy basyp aldy, al Marıýpol porty qorshaýda qaldy. Biraq Nıkolaev gýbernatory reseılik áskerler qaladan qýylǵanyn málim etti.

Ýkraınanyń soltústigindegi Harkov qalasy da qorshaýda.

Blınken Eýropaǵa alty kúndik saparynyń basynda Brússelde Eýropalyq Odaqtaǵy áriptesterimen kezdesti.

Onyń aıtýynsha, halyqaralyq qaýymdastyq Ýkraınaǵa kómektesý úshin qoldan kelgenniń bárin jasaıdy, sondaı-aq "Vladımır Pýtın bastaǵan soǵysty toqtatý úshin Reseıge aýyr qysym kórsetýge" daıyn.

"Ýkraınanyń jeńetinine senimdisiń be?" degen suraqqa ol: "Ýaqyt óte kele, múlde (senimdimin)" dep jaýap berdi.

Blınken sonymen qatar soǵystyń qansha ýaqytqa sozylatynyn aıta almaıtynyn jetkizdi.