Almatyda «Jańa Qazaqstan. Kúshimiz birlikte» jastar festıvali ótti. Jas qazaqstandyqtar memleket basshysynyń halyqqa joldaýynda jarıalanǵan saıası reformalar baǵdarlamasyn qoldady.

«Almaty Arena» alańynda ótken is-sharaǵa júzdegen jastar qozǵalysynyń belsendileri – óner qaıratkerleri, sportshylar, qoǵamdyq uıymdar ókilderi, jas kásipkerler men stýdentter qatysty.

Festıvál-konserttiń bastamashylary men demeýshileri bıznesmen, mesenat Syrymbek Taý jáne onyń joldastary boldy.

«Jańa Qazaqstan» jastar qozǵalysyn shyǵarmashyl jastar ókili Ońdasyn Qulymbet, G-38 stýdentter qozǵalysynyń negizin qalaýshy Aısulý Ernıazova, kásibı boksshy Janqosh Turarov jáne basqa da belsendi jastar ókilderi qoldady.

Qazaqstan Prezıdenti Qasym-Jomart Toqaev óziniń «Jańa Qazaqstan: jańarý men jańǵyrý joly» Joldaýynda: «Biz adamdardyń energıasyna, talanty men eńbekqorlyǵyna arqa súıeımiz. Árbir azamattyń ózin-ózi júzege asyrýy úshin barynsha qolaıly jaǵdaı jasaımyz. Tek osylaı ǵana biz halqymyzdyń jasampazdyq áleýetin arttyra alamyz» dep atap ótti.

Jastar festıvaliniń qatysýshysy-halyqaralyq bilim berý korporasıasynyń birinshi prorektory Qaıyrjan Meńdiǵalıev Prezıdenttiń bastamalaryn qoldaıdy. Ol «Jańa Qazaqstan» qozǵalysy jigerli jáne sapaly jumys isteýge umtylatyn jastarǵa kómektese alady dep sanaıdy.

«Men is-sharaǵa stýdenttermen birge «Jańa Qazaqstan» bastamasyn qoldaýǵa keldim. Búgin biz bárimiz prezıdentimiz Qasym-Jomart Kemeluly Toqaevtyń tóńiregine biriktik. Onyń ıdeıalary, reformalary, joldaýy aınalasynda. Qymbatty dostar, búginde bizdiń prezıdentimiz aıtqandaı – «Bizdiń kúshimiz – birlikte» Osy kúrdeli kezeńde elimizdiń táýelsizdigi men birligi sıaqty qundylyqtar birinshi orynǵa shyǵady», – dep atap ótti Qaıyrjan Meńdiǵalıev.

Qazaqstan-Brıtan tehnıkalyq ýnıversıtetiniń prorektory Ekaterına Smolákova: "Biz uly jetistikterdiń aldynda turmyz. Bolashaǵymyz búgin bastalady. Qazirgi jastar bilim men ınovasıaǵa, naqty maqsattarǵa umtylady. Men jańa Qazaqstandy qura alatynymyzǵa senimdimin. 16 naýryzda Qazaqstan halqyna joldaýynda prezıdent: «Men azamattarymyzdyń erteń emes, búgin baqytty ómir súrgenin qalaımyn», – dedi. Sondyqtan bizdiń jarqyn bolashaǵymyz búginnen bastalady. Jańa Qazaqstan – bul biz!» dep atap ótti.

Ánshi Baǵlan Ábdiraıymov progresıvtilikti, ózin men álemdi ózgertýge daıyndyqty sózben emes, ispen dáleldeýge shaqyrdy.

«Jastar óz ýaqyttaryn durys paıdalanyp, ony ıgi isterge jumsaýlary tıis. El men ulttyń bolashaǵy jastarǵa tikeleı baılanysty. Bizge bilimdi jáne qazaqstandyqtardyń patrıot urpaǵy, jańa Qazaqstannyń damý draıveri bolý qajet. Óz sózderiniń birinde prezıdent Qasym-Jomart Toqaev jastardyń qozǵaýshy kúsh ekenin, zor áleýetin atap ótti. Biz bul mejeni kóterýimiz kerek!», – dedi tanymal oryndaýshy.

Eske salsaq, 16 naýryzda qoǵam jáne bıznes ókilderi «Jańa Qazaqstan» qoǵamdyq jastar qozǵalysyn qurý týraly jarıalady. Bul uıym, qozǵalys bastamashylarynyń aıtýynsha, tek Almatyda ǵana emes, óńirlerdegi JOO stýdentterimen jumys isteıtin bolady. Osy qozǵalystyń qurmetine oraı ońtústik astananyń jastaryn biriktirgen «Jańa Qazaqstan. Kúshimiz birlikte» festıvali ótti.

Almaty qalasy ákiminiń baspasóz qyzmeti