Jýrnalıs, Aqparat salasynyń úzdigi İlıas Ysqaqov Naýryz merekesin Jańa jyl deńgeıinde toılaýǵa shaqyryp, erekshe bastama kóterdi. Ol úshin «Jańa kún» konsepsıasy usynylyp otyr. Konsepsıa Naýryz merekesin – «Jańa kún» merekesi dep belgileýdi kózdeıdi. Maqsat – «Jańa kúndi» qazaqtar ǵana emes, kúlli qazaqstandyqtardyń merekesine aınaldyrý.

Jýrnalıs ulystyń uly kúni qazaqstandyqtar úshin jańa jyl sekildi ortaq mereke retinde qalyptaspaı kelýiniń sebebin  Naýryzdy ózge ult ókilderi  qazaqtyń ulttyq merekesi, jańa jyly dep qabyldaıtynymen baılanystyrady. Sondyqtan İlıas Basharuly 22 naýryzdy barshaǵa ortaq «Jańa kún» meıramy retinde bekitýdi usynady. Odan bólek, ol «Jańa kún» meıramynyń da óz nyshany bolýy kerek ekenin alǵa tartady. Basharulynyń sózinshe, merekeniń belgisi retinde kún sımvolıkasy tańdalsa, meıramda kún pishimdes ashyq hattar men syılyqtar tabystalýǵa tıis.

– Adamdar úshin bul kún qaıta túleýdi, jańarýdy, tazalanýdy bildirmek. Qaıta qalyptasý men jańalyqtyń energıasy nur shashatyn kún. Jandúnıeńdi  tazartyp, zulymdyq pen qatygezdikten arylýǵa, súıispenshilikke, tatýlyqqa, beıbitshilikke, aýyzbirshilikke shaqyrady. Janyńdy, otbasyńdy, úı-ishin tazalaýdy mindetteıdi. Jylylyq pen jańa úmit ákeledi.  Bul kúni adamdar bir-birine degen ókpesin umytyp, keshirimdi bolýǵa shaqyrady. Tatýlyq pen dostyqty pash etedi. Osynyń bári árbir azamatqa ortaq tilek, qasıet! Endeshe «Jańa kún» ıdeologıasyn árbir qazaqstandyqtyń boıyna sińirip, jylda «Jańa kún» merekisin barlyǵymyz qarsy alatyndaı, ultqa, ulysqa bólinbeı barlyǵymyzǵa ortaq mereke retinde toılaıtyndaı dárejege kóteretin kez keldi dep oılaımyn, – deıdi jýrnalıs.