Prezıdenttiń baspasóz hatshysy Berik Ýálı Qasym-Jomart Toqaevtyń byltyrǵy atqarǵan qyzmeti týraly úshtomdyq jınaq jaryqqa shyqqanyn habarlady. Sózinshe jınaqqa prezıdenttiń ishki saıası is-sharalarda, shetelde ótken jıyndarda sóılegen sózderi jáne onyń otandyq, halyqaralyq máselelerge qatysty úndeýleri men málimdemeleri qamtylǵan. Jınaqty prezıdentiniń baspasóz qyzmeti qurastyrǵan. Osy jáne qańtar oqıǵasynan keıin prezıdent aınalasynda bolyp jatqan ózge de jaǵdaılarǵa qarap, el ishinde bul júıe Toqaevtan ekinshi Nazarbaev jasaýdy bastap ketti degen áńgimeler aıtyla bastady.

N.Nazarbaev eldi bılegen 30 jylda prezıdentke jaǵyný, ony maqtaý, madaqtaý, jyly sóz, án, óleń arnaý, oǵan baılanysty arnaıy bastamalar kóterý, usynys aıtý beleń aldy. Túrli teńeýler dúnıege keldi, tuńǵysh prezıdentti áspettegen tirkes, uıqas sózder shyqty. Resmı jıyn, is-sharalardyń bárinde derlik Nazarbaevtyń sózderinen sıtata keltirý ádetke aınaldy. Osylaısha, Nazarbaevtan kúlt jasaldy.

Endi mine, qańtar oqıǵasynan keıin bılikke tolyqtaı qoly jetken Toqaevqa baılanysty sondaı jaıttar baıqalyp, tarıh qaıtalanyp bara jatqandaı.

Máselen, kúni keshe ǵana prezıdent joldaýy Afrıkadaǵy Efıopıa elinde talqylanǵany týraly aqparat shyqty. Jıyn barysynda Qazaqstannyń Efıopıadaǵy elshisi Barlybaı Sadyqov prezıdent joldaýynyń negizgi baǵyttaryn aıtyp, Qazaqstandaǵy saıası júıeniń túbegeıli ózgerýi, "Halyq únine qulaq asatyn memleket" tujyrymdamasyn iske asyrýǵa baǵyttalǵan áleýmettik-ekonomıkalyq reformalar týraly aıtyp bergen.

Nazarbaev tusynda da prezıdent joldaýynan keıin ony qoldaý sharalary jappaı ótetin. Joldaý týraly "eldiń damýyn, baǵyt-baǵdaryn aıqyndaıtyn strategıalyq qujat, "damýdyń dańǵyl jolyna bastaıtyn qujat" degen sózder kóptep aıtylatyn. 

18 naýryzda "Jańa Qazaqstan" jastar qozǵalysy qurylýyna oraı uıymdastyrylǵan arnaıy festıválde "Nash prezıdent – tıgr" ("Bizdiń prezıdent – jolbarys" – qazaqsha) degen lozýng aıtylǵany áleýmettik jelide ótkir synǵa tap boldy.

 

 

 

Posmotret etý pýblıkasıý v Instagram

 

 

 

Pýblıkasıa ot ?? (@dana.halyq)

Artynsha jıynǵa stýdentterdi májbúrlep aparǵany týraly aqparattar shyqty.