Brússeldegi NATO samıtinde aláns elderiniń basshylary Reseıdiń Ýkraınaǵa basyp kirýin, Ýkraınaǵa kómek, álemdegi qaýipsizdikti saqtaý máselelerin talqylady.
AQSH prezıdenti Djo Baıden Reseıdi "Úlken jıyrmalyqtan" shyǵarý bastamasyn qoldap, Reseıdi shyǵarý múmkin bolmasa, "Úlken jıyrmalyqqa" Ýkraınany shaqyrýǵa bolatynyn aıtty.
Baıden sóziniń kóp bóligi alánsty birlikke shaqyrýǵa baılanysty boldy.
Ol Reseı prezıdentin toqtatýda sanksıanyń tıimdiligine ıek artatynyn jetkizdi.
Ulybrıtanıanyń premer-mınıstri Borıs Djonson NATO elderine Ýkraınany sapaly ári qajetti mólsherdegi qarýmen qamtamasyz etý qıyn bolatyn aıta otyryp, Brıtanıa men NATO-daǵy onyń ózge odaqtastary Ýkraınaǵa qarý jetkizýdi jalǵastyratynyn málim etti. Ol Ýkraına qarýly kúshterine ózge qarýdan bólek, 6000 zymyran jiberetinin aıtty.
Sondaı-aq ol sanksıany kúsheıtýge shaqyrdy.
– Bul – tek bastamasy. Biz Pýtınge Ýkraına jalǵyz emestigin jetkizgimiz keledi. Biz Kıev, Marıýpol, Lvov jáne Donesk halqyn qoldaımyz. Zelenskıı aıtqandaı, Ýkraına halqy jeńýge tıis, al Pýtın jeńilýi kerek, – dedi ol.
Borıs Djonson Vladımır Zelenskııdiń tank pen ushaq berý jónindegi ótinishin NATO-ǵa oryndaý logıkalyq túrde qıyn ekenin atap ótti.
NATO-nyń bas hatshysy Iens Stoltenberg aláns kúshteri soǵysqa qatysýdy josparlap otyrmaǵanyn qaıtalady.
– Biz Ýkraınany damyǵan PRO júıelerimen, tankke qarsy qarýmen, oq dári jáne janarmaımen qamtamasyz etemiz. Alaıda NATO kúshteri áýede de, jerde de konflıktke qatyspaıtynyn anyq aıtqan jón. Bul sheshim konflıkt Ýkraına aýmaǵynan shyǵyp ketpeýi úshin, budan da úlken qaıǵyǵa dýshar etip, ólim men qırandyǵa soqtyrmas úshin qabyldanyp otyr, – dedi ol.
Samıtke beınebaılanys arqyly qosylǵan Vladımır Zelenskıı Reseı basqynshylyǵynan kelgen shyǵyn men zalal týraly aıtyp, Eýropa elderin Ýkraınany qoldaýǵa birikkeni úshin alǵys bildirdi.
Alaıda ol kómek sál kesh kelgenin aıtyp, "eger Eýropa sanksıalaryn erterek qabyldaǵanda bálkim, Reseı soǵysqa barmaıtyn ba edi" dedi.
Sondaı-aq ol Ýkraınanyń Eýroodaqqa qosylý týraly ótinishin qabyldaýdy ótindi.
Zelenskıı úndeýinde Eýropa odaǵyna kiretin keı elderdiń kómektesý úshin kóp nárse istep jatpaǵanyn nemese múlde únsiz otyrǵanyn synady.
Ol Ýkraınaǵa kómek úshin Polshany, Estonıa, Chehıa jáne Italıany maqtady. Fransıaǵa prezıdentine "biz úshin tura alatynyńa senemin" dese, Shvesıaǵa qarata sóılegende týlaryndaǵy tústerdiń uqsastyǵyn meńzep "sarylar men kókter árqashan birge bolýǵa tıis" dedi.
Germanıa, Portýgalıa, Irlandıanyń kesh qabyldaǵan sharalary men qulyqsyzdyǵyna nazar aýdaryp, Vengrıanyń beıtaraptyǵyn synady.
Derekkkóz: VVS
Pikir qaldyrý