Nur-Sultan qalasynda Bas múftı Naýryzbaı qajy Taǵanulynyń tóraǵalyǵymen Qazaqstan musylmandary dinı basqarmasynyń tóralqa májilisi ótti, dep habarlady basqarmanyń baspasóz qyzmeti – muftyat.kz saıty.

Tóralqa májilisinde naıb múftı, Sharıǵat jáne pátýa bóliminiń meńgerýshisi Sansyzbaı Qurbanuly bıyl qasıetti Ramazan aıy 2 sáýirden bastalatynyn, Ózbekstan, Qyrǵyzstan musylmandary dinı basqarmasymen keńesip, osyndaı ortaq sheshim qabyldanǵanyn atap ótti.

Sonymen bıyl Ramazan aıy 2 sáýirde bastalyp, 1 mamyrda aıaqtalady. Oraza 30 kún bolmaq. 2 mamyr – Oraza aıt kúni. 27 sáýirden 28 sáýirge qaraǵan tún – Qadir túni.

Bıyl pitir mólsheri 500 teńge bolyp belgilendi. Pitir sadaqanyń mólsheri el boıynsha 2 keli unnyń ortasha baǵasymen eseptelgen.