Reseıdegi Máskeý qalalyq dýmasynyń depýtaty Sergeı Savostánov Lıtva, Latvıa, Estonıa, Polsha, Moldova jáne Qazaqstanǵa Ýkraınadaǵydaı denasıfısıkasıa men demılıtarızısıa júrgizý kerektigin, basqasha aıtqanda basyp kirý kerektigin málim etti. Osylaı delingen qujatty reseılik "Iabloko" partıasy Máskeý fılıaly basshysynyń orynbasary Kırıll Goncharov facebook paraqshasyna jarıalady.

"Ýkraınadaǵy demılıtarızasıa men denasıfıkasıa Ýkraına, Reseı men Eýropa halqynyń turaqty qaýipsizdigin qamtamasyz etedi. Reseı tolyq qaýipsizdikti qamtamasyz etýi úshin Ýkraınadan bólek denasıfıkasıı men demılıtarızasıaǵa Prıbaltıkany (Lıtva, Latvıa, Estonıa – red.), Polshany, Moldova men Qazaqstandy qosqan durys bolady dep sanaımyn" deıdi Sergeı Savostánov resmı qujatta.

Reseı 24 aqpanda Ýkraınaǵa basyp kirgende, Ýkraınada "demılıtarızasıa" (qarýsyzdandyrý) men "denasıfıkasıa" (nasıstik ıdeologıadan tazartý) júrgizýdi maqsat etip otyrǵanyn málim etken.

Buǵan deıin de Reseı sheneýnikteriniń tarapynan Qazaqstanǵa qarata arandatýshylyq sózder, eldiń aýmaqtyq tutastyǵyna nuqsan keletin málimdemeler aıtylǵan. Qazaqstan bıliginiń ókilderi ondaı málimdemeler Kremldiń resmı ustanymyn bildirmeıdi, tek jekelegen adamdardyń sózi degendi áldeneshe ret qaıtalaǵan. Al jaqynda májilis depýtaty Aıdos Sarym Reseıdiń Ýkraınaǵa basqynshylyǵy týraly ashyq aıtqysy kelmeıtinin, onyń kózqarasy Qazaqstannyń resmı ustanymyn biodirgendeı bolyp qalatynyn jetkizgen.