Quqyqqorǵaý organy qyzmetkerin qorlady, "jalǵan aqparat" taratty degen aıyptarmen ústinen eki qylmystyq is qozǵalyp, abaqtyǵa qamalǵan saıası belsendi, tirkelmegen "Demokratıalyq partıanyń" jetekshisi Janbolat Mamaı amnıstıamen bostandyqqa shyǵarylmady. Bul týraly onyń jaqtastary málim etti.
"Janbolat Mamaı túrmede qaldy. Jaqtastary narazy. "Kinásin moıyndamady" degen syltaýmen bostandyq bermeı qoıdy. Ol joq kináni nege moıyndaýy kerek? Oǵan qatysty amnıstıa qoldanbaǵany zańsyz. Ony qamap, zańsyzdyqqa barǵanymen qoımaı, kinásin moıyndatpaq bolǵany eki ese zańsyz. Janbolattyń moıyndaıtyndaı esh kinási joq. Onyń bostandyǵy úshin kúresemiz. Janbolat bosamaıynsha Toqaevqa tynym bermeımiz, halyqaralyq qaýymdastyq ta oǵan tynyshtyq bermeıdi" deıdi belsendiniń áıeli, jýrnalıs Inga Imanbaı Facebook-tegi tikeleı efırde.
Janbolat Mamaıdyń jaqtastary belsendini bostandyqqa shyǵarmaǵan soń aldymen "Sı-18" dep atalyp ketken LA-155/18 mekemesiniń aldynda, artynsha Almaty qalasy polısıa departamenti ǵımaraty aldynda narazylyq ótkizdi.
Almaty qalasy Almaly aýdanynyń prokýrory Baýyrjan Ertaev Janbolat Mamaıdyń bostandyqqa shyǵarylmaýyna joǵarǵy sottyń sot úkimi týraly 4-normatıvtik qaýlysynyń 9-tarmaǵy negiz bolǵanyn málim etti. Ol boıynsha raqymshylyq qoldanatyn kezde amnıstıany qoldaný týraly kelisim berilgen jaǵdaıda, aıyptalýshy kinásin moıyndaýy kerek. Al Janbolat Mamaı moıyndaıtyndaı kinási joqtyǵyn, taǵylǵan aıyp negizsiz ekenin málimdep, taǵylǵan aıypty moıyndaýdan bas tartqan.
Janbolat Mamaıdyń jaqtastary men adam quqyǵy salasyndaǵy bedeldi halyqaralyq Human Rights Watch jáne Amnesty International uıymdary belsendini qýdalaýdyń saıası astary bar ekenin aıtady.
Pikir qaldyrý