Úkimette kapıtaldy shetelden elge qaıtarýdy yntalandyrý jáne elden qarajattyń jylystaýyna qarsy is-qımyl jasaýǵa baǵyttalǵan sharalardy kúsheıtý jónindegi usynystardy talqylaý boıynsha keńes ótip, komısıa jáne onyń aıasynda bes jumys toby quryldy.

Premer-mınıstrdiń baspasóz qyzmeti taratqan aqparatta atalǵan jumys toptary aqshalaı qarajattyń jylystaýy boıynsha taldaý júrgizip, kapıtaldy shetelden elge qaıtarýdy yntalandyrý, shekteý sharalaryn engizý, shyǵarylǵan kapıtaldy qaıtarý sharalaryn qabyldaýǵa baılanysty tıisti usynystardy ázirleıtini aıtylǵan.

"Atap aıtqanda, Qarjy mınıstrliginiń Memlekettik kirister komıtetine valútalyq baqylaýdyń jekelegen fýnksıalaryn berý jónindegi usynystar talqylandy. Yntalandyrý sharalarynyń biri – kelip túsken valútalyq túsimniń 80%-yna aıyrbas jasalǵan jaǵdaıda, qaıtarýǵa usynylǵan QQS somalaryn ońaılatylǵan tártippen óteý. Sondaı-aq rezıdent emesterge dıvıdendter tóleý kezinde salyqtyq jeńildikterdi joıý, rezıdent emes ózara baılanysty tulǵalar kórsetken materıaldyq emes qyzmetter boıynsha shegerimderdi shekteýdi engizý sıaqty sharalar usynylady. "Transferttik baǵa belgileý týraly" QR Zańyn jetildirýge baǵyttalǵan normalar ázirlendi. Odan bólek, kapıtaldy elge qaıtarýdy yntalandyrý, sondaı-aq kapıtaldy elden shyǵarýdy salyqtyq ákimshilendirýdi kúsheıtý boıynsha da sharalar pysyqtalyp jatyr. Komısıa jumysynyń qorytyndysy boıynsha tıisti usynystar Memleket basshysynyń atyna joldanady" delingen habarlamady.