Eńbek jáne halyqty áleýmettik qorǵaý mınıstrligi 1 sáýirdegi jaǵdaı boıynsha 3 078 etnıkalyq qazaq tarıhı otanyna oralyp, qandas mártebesin alǵanyn habarlady. 1991 jyldan beri 1 mıllıon 90,1 myń etnıkalyq qazaq atamekenine kelgen.

Jyl basynan Qazaqstanǵa kelgen qandastardyń jartysynan kóbi (66,3%) Ózbekstannan, 11,3% – Qytaıdan, 10,9% – Túrikmenstannan, 2,2% – Mońǵolıadan jáne 9,3% basqa elderden.

Kelgen etnıkalyq qazaqtar negizinen Almaty (30,2%), Mańǵystaý (19%), Túrkistan (11,4%) jáne Jambyl (5,9%) oblystaryna, sondaı-aq Almaty (6,5%), Nur-Sultan (7,1%) jáne Shymkent (7,6%) qalalaryna qonystandy.

1 sáýirdegi jaǵdaı boıynsha eńbekke qabiletti jastaǵy etnıkalyq qonys aýdarýshylar sany 62,7%-dy, eńbekke qabiletti jastan kishi 23,2%-dy jáne zeınetkerler 14,1%-dy quraıdy.

Eńbekke qabiletti jastaǵy qandastardyń ishinen bilim deńgeıi boıynsha 11,5%-y joǵary bilimdi, 39,6%-y orta kásibı bilimdi, 47%-y jalpy orta bilimdi jáne 1,8%-ynyń bilimi joq.