Ýkraınanyń bas shtaby 24 aqpannan beri mert bolǵan, jaralanǵan Reseı áskeriniń sany 19 myńnan asatynyn málim etti. Budan bólek Reseıdiń áskerı shyǵyny 725 tank, 1923 áskerı kólik, 347 artılerıalyq júıe, 154 ushaq, 137 tik ushaq, 7 kemeni quraıdy. Ýkraınadaǵy jaǵdaıǵa baılanysty budan ózge mańyzdy aqparattar jıyntyǵy tómende usynylyp otyr.

♦ Reseı qorǵanys mınıstrligi Ýkraınada 78 ásker nysannyń, Ýkraınaǵa Eýropa elderiniń biri bergen tórt S-300 zymyran kesheniniń kózi joıylǵanyn málim etti;

♦ Ulybrıtanıanyń premer-mınıstri Borıs Djonson Ýkraınaǵa jasaǵan saparynda London Kıevke qosymsha 120 bronotehnıka men kemege qarsy zymyran júıesin jiberetinin jetkizdi;

♦ Ýkraına bas prokýrory Kıev oblysynda 1200-den asa adamnyń denesi tabylǵanyn habarlady. Reseıdiń Kıev oblysyna basqynshylyǵynan kelgen adam shyǵyny munymen bitpeýi múmkin. Býzovaıa eldimekeninde ondaǵan jergilikti turǵyn bir jerge kómilgeni belgili boldy. Ýkraına bıligi áskerı qylmys deregi boıynsha 5600 is ashqan. Reseı bıligi beıbit turǵyndardy jappaı óltirý derekterin joqqa shyǵarady;

♦ Prezıdent Vladımır Zelenskıı Reseı eldiń shyǵysyna úlken aýqymdy urystar josparlap otyrǵanyn eskertti;

♦ Reseıdiń Ýkraınaǵa qarsy agresıasynan keıin Fınlándıa men Shvesıa NATO-ǵa osy jazda múshe atanýy múmkin ekeni týraly habarlandy. Eger jospar júzege assa, Fınlándıa NATO elderi arasynda Reseımen shekarasy eń uzaq (1340 km) elge aınalady. Shekara Reseıdiń iri qalasy Sankt-Peterbýrgten 200 shaqyrym jerde jatyr. Atalǵan el qyrǵı-qabaq soǵysy kezinde de KSRO-men dostyq neıtralıtetin berik ustanǵan. Al Shvesıa 200 jyldan astam ýaqyt eshqandaı áskerı odaqqa qosylmaǵan. Endi mine, Reseı Ýkraınaǵa soǵys ashqaly eki el de jedel túrde NATO alánsyna ótýge asyǵyp otyr.