Reseıde naýryz aıynan beri jumys izdeýge arnalǵan HeadHunter jáne SuperJob saıttarynda kelisim-shartpen áskerı qyzmetke shaqyratyn myńdaǵan habarlandyrý paıda bolǵan. VVS Reseı atalǵan habarlandyrýlar arqyly Ýkraınadaǵy soǵysqa adam izdep jatqanyn anyqtaǵan.
Aty-jónin jasyrýdy qup kórgen ekspert VVS-ge Reseıde ádette kelisim-shartpen qyzmet etetin áskerılerdi ınternettegi habarlandyrý arqyly emes, áskerı komısarıattar arqyly alatynyn aıtqan. Onyń sózin HeadHunter saıtyndaǵy derekter de rastaıdy. Saıttaǵy áskerı qyzmet týraly 3 myń habarlandyrýdyń túgeli sońǵy aıda jarıalanǵan. Alaıda saıt ókilderi mundaı vakansıalar saıtta buryn da jarıalanǵanyn málim etken. Alaıla olardyń sany qazirgiden edáýir az.
Taǵy bir tanymal Superjob saıtynda bir aptada áskerı qyzmetke shaqyrǵan 18 myńnan astam habarlandyrý shyqqan. Qorǵanys mınıstrligine qatysy bar saıtta osyǵan uqsas 500 vakansıa jarıalanǵan.
VVS jýrnalıseri jumys izdep júrgen adam bolyp birneshe habarlandyrýda kórsetilgen nomerlerge qońyraý shalǵan. Sóılesýshilerdiń basym kópshiligi áskerı qyzmet qaıda ótetinin ashyp aıtqysy kelmegen. Tek keıbiri ǵana Ýkraınaǵa attanatynyn, qujattardy rásimdeýge 1-2 apta ketetinin aıtqan.
Áskerı qyzmet 3-6 aıdan 1 jylǵa deıin jalǵasýy múmkin ekeni, jalaqy mólsheri habarlandyrýlardyń basym kópshiliginde 30-50 myń rúbl (shamamen 150 - 250 myń teńge) arasynda bolatyny jazylǵan. Áskerı shen men atqaratyn mindetke baılanysty 210 myń rúblden (1 mln teńgeden astam) joǵary jalaqy usynylatyny týraly da habarlandyrýlar bar.
Vakansıalarda negizinen áskerı boryshyn ótegenderge basymdyq berilgen. Arasynda áskerde bolmaǵandardy da qabyldaıtyny týraly, 9-synyp bitirgenderdi de alatynyn jazǵandar da kezdesken.
Soǵysqa kelisim-shart negizindegi qyzmetkerlerden bólek, eriktiler de alynyp jatyr. Jalpyreseı memleketttik televızıa jáne radıotaratý kompanıasynyń korespondenti óziniń telegram kanalynda Máskeý oblysynda eriktilerge 205 myń rúbl (1 mln teńgeden astam) tólenetini, jaralanǵandarǵa 3 mln rúbl (15 mln teńge), qaza tapqandardyń otbasyna 8 mln rúbl (40 mln teńge) jáne gýbernatordan 5 mln rúbl (25 mln teńge), balalaryna páter beriletini týraly jazǵan.
Reseı qorǵanys mınıstrligi áskerdegi adam shyǵyny týraly derekti sońǵy ret 25 naýryzda jarıalalap, 1351 áskerı qyzmetshisinen aıyrylǵanyn habarlaǵan. Ýkraına qorǵanys mınıstrligi 13 sáýirde jarıalaǵan málimetke saı, Reseıdiń adam shyǵyny 19,8 myńdy quraıdy. Alaıda ÝNIAN agenttigi bul sıfrǵa jaralanǵandar da kiretinin naqtylaǵan.
Pikir qaldyrý