Búgin májilis depýtattary prezıdent Qasym-Jomart Toqaevtyń memlekettik apparattyń qyzmetin búrokratıadan aryltý týraly jarlyǵyna qoldaý kórsetip, óz pikirlerin bildirdi.

Máselen depýtat Meırambek Tólepbergen facebook-tegi paraqshasynda jarlyqta júıeli jáne qoldanbaly sharalar kesheni qarastyrylǵanyn aıtyp, qujattyń mańyzdylyǵyna toqtaldy.

«Bul sharalardyń barlyǵy memlekettik apparattyń tıimdi jumys isteýine yqpal etedi», – dedi M.Tólepbergen.

​Májilis depýtaty Erlan Saırov jarlyq memlekettik organdar jumysynyń tıimdiligin arttyrýǵa septigin tıgizetinin aıtty.

«Jedel sheshim qabyldaıtyn kezde, sheneýnikter búrokratıaǵa salynyp qashqaqtaıdy. Bul – óz kezeginde, kóptegen kúrmeýli máselelerdiń jyldar boıy sheshilmeýine alyp keledi. Qujat osy júıeli problemalardy retteýdiń joly bolmaq», – dedi E.Saırov.

Depýtattar prezıdent jarlyǵy memlekettik apparattyń jumysyn ońtaılandyrýdy tezdetýge jol ashady degen pikir aıtty.

«Memlekettik apparattyń maqsaty aıqyn. Ol – halyqtyń múddesin kózdeıtin mańyzdy qujatty el ıgiligi úshin tıimdi oryndaý», – dedi Nurlybek Ojaev facebook-tegi paraqshasynda.

Sonymen qatar májilis depýtattary prezıdent jarlyǵy memlekettik qyzmetti zaman talabyna saı jetildirýge baǵyttalǵanyn aıtyp, facebook-tegi paraqshalarynda óz oılarymen bólisti.

​«Eń aldymen sheshim qabyldaný úderisi jyldamdatylady. Odan keıin,  memlekettik organdardaǵy birinshi basshylardyń derbestigi artyp, qujat aınalymy men qaǵazbastylyq azaıady», – dep jazdy Májilis depýtaty Baýyrjan Sartbaev.

​Sondaı-aq depýtat Baqytbek Smaǵul búrokratıanyń halyq pen bızneske qıyndyq ákeletinin aıtyp, Jarlyqtyń osy máselelerdi túbegeıli sheshetinine nazar aýdardy.

«Prezıdenttiń búgingi jarlyǵy memleket pen ulttyq múddeni kózdeıtin asa mańyzdy qujat bolyp otyr. Jańa Qazaqstandy qurýǵa baǵyttalǵan tarıhı qujattardyń biri bolady jáne naqty júzege asyrylady degen úmittemin», – deıdi Baqytbek Smaǵul.