Bas prokýratýranyń birinshi qyzmet bastyǵynyń orynbasary Eldos Qılymjanov Ortalyq komýnıkasıalar qyzmetinde ótken brıfıńte qańtar oqıǵasy kezinde qıratýǵa qatysqandarǵa 20-dan 100 dollarǵa deıin tólengeni týraly habarlady.

Eldos Qılymjanovtyń sózinshe, Almaty oblysynda "O" jáne "N" esimdi azamattar Taldyqorǵan qalasynda qıratýlar, azamattardyń múlikterin joıý jáne memlekettik obektilerdi basyp alý qatysýshylaryn qarjylandyrǵan. 

– Bul faktiler tergeý barysynda anyqtaldy jáne jappaı tártipsizdikterge qatysqany úshin kúdiktelgen adamdardyń jaýaptarymen rastalady. Jambyl oblysynyń turǵyny 2022 jylǵy 4 qańtarda Almaty qalasynda bolyp, "Telegramm" kanal ashyp, oǵan sanaýly saǵattarda birneshe myń qatysýshy jazyldy. Osy telegramm kanal arqyly onyń qatysýshylary barıkadalardy qurý, "Molotova" kokteılderin daıyndaý jáne quqyq qorǵaý qyzmetkerlerine qarsylyq bildirý úshin tolyq nusqaýlyq alyp otyrǵan. Keıin aǵymdaǵy jylǵy 5-6 qańtarda atalǵan kanal arqyly qıratýshylardyń qozǵalysy jáne olardyń Jambyl oblysynyń memlekettik obektilerine jasaǵan shabýyldaryn túzetý týraly aqparat júrdi. Kúdikti adam anyqtaldy jáne ol qazirgi ýaqytta qamaýda. Osy óńirde "Gazel" avtokóliginiń júrgizýshisi "S" jáne onyń jaqtasy "K" esimdi azamattar anyqtaldy. Olar atalǵan kólikpen júrip, aldyn ala daıyndalǵan armatýrany, urlanǵan polısıanyń qalqandary men bronjıletterin taratqan. Sondaı-aq, quqyq qorǵaý qyzmetkerleriniń júrýin qıyndatý úshin, olar avtokólikti joldardy jabýda qoldanǵan. Qylmystyq isterdi taldaý nátıjelerimen osy qylmystardy jasaýdyń uqsas tásilderi qaıǵyly oqıǵalar bolǵan basqa óńirlerde de baıqalatynyn kórsetti. Bul mán-jaılar olardyń úılestirilýin jáne biryńǵaı jospardyń bolǵandyǵyn kórsetedi, – dedi ol.

Eldos Qılymjanov Almaty qalasynda ustalǵan 4 kúdikti áleýmettik jeli arqyly armatýra kesindilerin daıyndaý jáne qıratýshylar ornalasqan jerge tasymaldaý týraly nusqaýlar alǵanyn, qazirgi ýaqytta olardyń úılestirýshilerin anyqtaý boıynsha jumystar júrgizilip jatqanyn atap ótti.