AQSH qorǵanys mınıstri Lloıd Ostın amerıkalyq delegasıanyń Kıevke saparynan soń málimdeme jasady, dep habarlady Reuters.

Ostın Ýkraınadaǵy shaıqastyń sıpaty ózgergenin, sondyqtan Kıevke uzaq qashyqtyqtaǵy qarýlar jáne tankter qajet ekenin aıtady. Onyń sózinshe, AQSH Ýkraınadan alysta jatqandyqtan ol jaqqa jetkizilgen qarý-jaraqtardyń jaǵdaıy qalaı bolatynyn oǵanmqadaǵalaý qıyn. Biraq ol qarý-jaraq múmkindiginshe jaqsy qadaǵalanatynyna kóz jetkizý úshin ýkraındermen sóıleskenin jetkizdi.

"Jeńiske jetýdiń birinshi qadamy – jeńe alatynyńa sený. Biz jeńe alatynymyzǵa senemiz, olarda durys qural-jabdyqtar, durys qoldaý bolsa, jeńiske jetedi" deıdi ol.

Pentagon basshysy Zelenskııdiń AQSH kómegine rıza bolǵanyn, biraq tabysty bolý úshin odan ári ne qajet ekenine nazar aýdaratynyn aıtty.