22 sáýir kúni ónerdiń qarashańyraǵy atanǵan kıeli oqý ordasy – T.Q. Júrgenov atyndaǵy Qazaq ulttyq óner akademıasynda mektep jáne kolej bitirýshi túlekter úshin «Ashyq esik» kúni ótti.

Sharanyń resmı bólimi akademıa alańynda belgili óner maıtalmandary, estrada, bı, teatr, kıno jáne tv, beıneleý, sán salasynyń ókilderi qatysqan merekelik konsertpen bastaldy.

Saltanatty jıyndy ashqan akademıa rektory, Qazaqstannyń eńbek sińirgen qaıratkeri Azamat Satybaldy armanyna qadam basqan jas talapkerlerdi óner ordasy qarsy alýǵa daıyn ekenin jetkizdi.

«67 jylǵa jýyq tarıhy bar óner akademıasynan qazaqtyń nebir bulbuly men dúldúli túlep ushqany belgili. Búginde halyq artıseri, elimizge eńbek sińirgen qaıratkerler osy qasıetti qarashańyraqtan óz sybaǵasyn alyp, óner kóginde qalyqtap keledi. Óz ultynyń nebir sahna sheberleri, óner maıtalmandary, talantty tulǵalar qalyptastyrǵan úlken mektepten bilim alý – ónerge talasy bar árkimniń de armany bolsa kerek.

Búgingi ashyq esik kúnine óz armanyn arqalap kelgen órenderdiń kózinde erekshe sezim, ǵajap ushqyn menmundalap turǵanyn kórip turmyn. Endeshe, sol ushqyndy jalyndatýǵa, talanttardyń qabiletin ushtaı túsýge, olardyń naǵyz sheber óner ıesi atanýyna baǵyttaıtyn biregeı óner ordasy sizderdi qarsy alýǵa daıyn», - dedi akademıa rektory óz sózinde.

Qazaqstannyń halyq ártisi Tuńǵyshbaı Jamanqulov, Qazaqstannyń eńbek sińirgen qaıratkerleri – Dýlyǵa Aqmolda, Berik Aıtjanov, teatr jáne kıno juldyzdary Erkebulan Daıyrov, Asan Majıt, Rústem Janyamanov, Qazaqstannyń eńbek sińirgen qaıratkeri Tolqyn Zabırova, shoý-bıznestiń jarqyn juldyzdary Kámshat Joldybaeva, Gaýhar Qaspaqova, Aırı, «Alashuly» jáne «Alataý serileri», kıno salasynyń beldi ókilderi Asqar Uzabaev, Adaı Abeldınov, ónertaný ǵylymynyń maıtalmandary, otandyq belgili sýretshi jáne dızaınerler, tanymal horeograftar men bıshiler -  Júrgenov akademıasynyń talantty túlekteri arnaıy tóselgen qyzyl kilemmen júrip ótip, jas talapkerlerge sáttilik tiledi.

«Ashyq esik» kúni saltanatty túrde ashylǵan soń joǵaryda atalǵan mádenıet qaıratkerlerimen jáne shyǵarmashyl jastarmen kezdesý uıymdastyrylyp, ár fakúltet jáne kafedra arnaıy sheberlik saǵattaryn ótkizdi.

Sondaı-aq, talapkerler Akademıa ǵımaratyn aralap, oqý bólmelerin jáne sabaqtardyń ótý barysyn tamashalady.

Jyl saıynǵy dástúrge aınalǵan shara mektep jáne kolej bitirýshi túlekterge Akademıada oqytylatyn  barlyq mamandyqpen tanysýǵa múmkindik berdi.

Bolashaq stýdentter alty fakúltet, eki kafedra boıynsha tolyq málimet alyp, daıarlyq baǵdarlamasymen tanysyp, mamandyq tańdaý jaıly suraqtaryna jaýap aldy.

T. Júrgenov atyndaǵy Qazaq ulttyq óner akademıasynyń baspasóz qyzmeti