Almatyda búgin tirkelmegen Demokratıalyq partıanyń birneshe ókilin polısıa qamaýǵa aldy.

Belsendi, jýrnalıs Inga Imanbaıdyń aıtýynsha, polısıa ustap alyp ketkenderdiń qatarynda belsendiler Meıirhan Jolaev, Arýjan Dúısebaeva, Gúlnár Mırmambetova, Nurbol Baıterekov, Nurbol Kasymbekov bar. Meıirhan Jolaev pen Arýjan Dúısebaevany "beıbit jıyn ótkizý tártibin buzdy" degen aıyppen 15 táýlikke qamaǵan.

Sondaı-aq polısıa búgin belsendi Abzal Dostıarovty úıine izdep barsa, keshe Dáýren Dostıarovty polısıa alyp ketpek bolǵan.

Inga Imanbaı búgin uıymdastyrylǵan baspasóz máslıhaty kezinde sońǵy ýaqytta "Dempartıa" ókilderin ańdý jıilegenin, polısıanyń bul áreketin 7 mamyr kúngi mıtıńpen baılanystyratynyn málim etti.

Belsendiler 7 mamyrda mıtıńke shyǵyp, qamaýda otyrǵan bastamashyl top jetekshisi Janbolat Mamaıdy bosatýdy talap etýdi josparlaǵan. Inga Imanbaıdyń ózi de áldeneshe ret prokýratýra tarapynan shaqyrý alǵanyn jetkizdi. Sózinshe, 4 qańtar kúngi tikeleı efır men vıdeolardaǵy daýsyna saraptama jasalyp, sony tergegeli jatyr.

Sonymen qatar búgin belsendi Nurbol Qanatbekov ustalar aldynda Janbolat Mamaıdyń ákesin kólikpen áketip bara jatqanda jol apatyna ushyraǵan. Ol kólik toqtap turǵanda belgisiz er adam terezesin qaǵyp, ashqan kezde moınynan qylqyndyra bastaǵanyn, odan qutylmaq bolyp, kelesi kólikke soǵylǵanyn aıtady.

Belsendiler "júrgizýshige shabýyldaǵan adamdy polısıa alyp ketti, biraq onyń túr-túlǵasyn áli aıtpady, ol ózderiniń arandatýshysy bolýy múmkin" dep otyr.