2023 jyldan bastap memlekettik qyzmetke irikteýdi proktorıng tehnologıasyn qoldaný arqyly onlaın túrde ótkizý josparlanyp otyr. Bul týraly memlekettik qyzmet isteri agenttiginiń tóraǵasy Darhan Jazyqbaev prezıdent qabyldaýynda bolǵanynda málim etti.

Aqorda saıtynyń aqparatynsha, Darhan Jazyqbaev memlekettik qyzmetke kirý úshin artyq kedergiler men tosqaýyldardy alyp tastaý jáne odan shyǵý tártibin jeńildetý, memlekettik qyzmettiń kez kelgen qazaqstandyqqa ashyq bolýyna qatysty usynystar berip, memlekettik apparattyń qyzmetin búrokratıadan aryltý jumystary jóninde aıtqan.

"Agenttik tóraǵasy prezıdentke 2022-2023 jyldary "E-qyzmet" aqparattyq júıesin jańǵyrtý týraly josparyn usyndy. Onyń aıtýynsha, bıyl syrtqy portaldy qurý arqyly "E-qyzmet" bazasynda memlekettik qyzmetke irikteý jáne qabyldaý prosesi tolyq sıfrlandyrylady. Al 2023 jyly basqa da kadrlyq úderister, atap aıtqanda, rotasıa, taǵylymdama, biliktilikti arttyrý jáne basqa da qyzmetter avtomattandyrylady. Sonymen qatar Darhan Jazyqbaev memlekettik qyzmet kórsetý sapasyn jetildirý barysyna da toqtaldy. Vedomstvo basshysy Agenttiktiń 2023 jyldan bastap memlekettik qyzmetke irikteýdi proktorıng tehnologıasyn qoldaný arqyly onlaın túrde ótkizýdi josparlap otyrǵanyn jetkizdi" delingen Aqorda aqparatynda.