SHQO ákimi Danıal Ahmetov Qazaqstandaǵy balalar jyly aıasynda óńirdiń daryndy oqýshylarymen, respýblıkalyq jáne halyqaralyq zıatkerlik olımpıadalardyń, sporttyq jarystardyń, shyǵarmashylyq konkýrstardyń jáne WorldSkills Kazakhstan Ulttyq chempıonatynyń jeńimpazdarymen kezdesti.

İs-shara balalar jyly aıasynda ótkizildi. Basty maqsat – oqýda úzdik, shyǵarmashylyqta jáne sportta joǵary jetistikter kórsetken talantty oqýshylar men stýdentterge qurmet kórsetip, qoldaý bildirip, jetistikterge jigerlendirý, halqyna degen súıispenshilik sezimdi uıalatyp, óz eliniń patrıoty bolýǵa tárbıeleý.

Sharanyń basynda óńir basshysy sóz alyp, jınalǵan óskeleń urpaqqa bolashaqqa baǵdar beretin oı aıtty.

«Qazaqstan álemde qazba baılyqtary mol memleketterdiń biri. Osynaý ıgilikti iske asyryp, jahanda aldyńǵy qatarda el bolýy úshin senderdiń bilimdi bolýlaryń aıryqsha qajet. Sondyqtan da básekege qabiletti bolyp, úlgerimderiń jaqsy bolýy tıis. Óńirde alańsyz bilim alýǵa barlyq jaǵdaı jasalǵan. Endeshe jas dostarym bereke-birliktiń qadirin bilip, halyqtar arasyndaǵy dostyqqa erekshe mán berip, qasıetti otanymyz Qazaqstannyń damýyna bip kisideı úles qosady degen mol senimdemin» dedi SHQO ákimi Danıal Ahmetov.

2021 jyly Shyǵys Qazaqstan oblysynyń oqýshylary bedeldi halyqaralyq jáne respýblıkalyq olımpıadalarda joǵarǵy kórsetkishterge qol jetkizdi. Oqýshylar 208 medaldi jeńip aldy, onyń ishinde 60 altyn, 66 kúmis jáne 82 qola bar.

Sońǵy úsh jyl ishinde óńirdegi kolej stýdentteriniń komandasy WorldSkills Kazakhstan Ulttyq chempıonatynyń absolútti jeńimpazdary atanyp, halyqaralyq arenada eldiń atyn shyǵaryp, el namysyn abyroımen qorǵap keledi.

2021 jyly WorldSkills Kazakhstan Ulttyq chempıonatynda kolej stýdentteri 27 medal jeńip aldy, onyń ishinde 13 altyn, 5 kúmis jáne 9 qola bar.

Aımaq basshysymen kezdesýge kelgen barlyq qatysýshylarǵa oblys ákiminiń atynan gramotalar men dıplomdar tabystalady. Sonymen qatar WorldSkills Kazakhstan Ulttyq chempıonatynyń jeńimpazdaryna noýtbýktar syıǵa tartylyp, daryndy oqýshylarǵa 100 000 teńgeniń sertıfıkaty berildi.