Prezıdent Qasym-Jomart Toqaev eks-prezıdent Nursultan Nazarbaevtyń statýsyna  baılanysty Konstıtýsıalyq keńeske júgindi. Bul týraly ádilet mınıstri Qanat Mýsın málim etti.

"Bul joly prezıdent 91-bap 2-bóliginiń jańa redaksıasyn usyndy. Ol jerde konstıtýsıadan Elbasynyń statýsy týraly normany múlde alyp tastaý kózdelgen" dedi Mýsın.

Al senat keshe májilis maquldaǵan "Referendým týraly" Zańnan Elbasy týraly normany alyp tastap, májiliske qaıtardy. Senat tóraǵasy Máýlen Áshimbaev el konstıtýsıasyna Nursultan Nazarbaevtyń statýsyn bekitýge qarsylardyń úlesi kóp ekenin atap ótti.

"Azamattarymyz sońǵy kúnderi konstıtýsıaǵa Elbasyǵa arnalǵan arnaıy bap engizýge qatty qarsylyq tanytty. Azamattardyń bul tilegi eskerildi. Ózderińiz de osyndaı pozısıadasyzdar ǵoı. 95-99 paıyzyńyz shyǵar" dedi ol jýrnalıserge.

Buǵan deıin Nursultan Nazarbaevqa aıryqsha quzyretter men kepildikter beretin 2000 jyly qabyldanǵan "Qazaqstan Respýblıkasynyń Tuńǵysh Prezıdenti - Elbasy týraly" konstıtýsıalyq zań kúshin joıatyny, tuńǵysh prezıdent mártebesin konstıtýsıada "táýelsiz Qazaqstannyń negizin qalaýshy" retinde aıqyndaý kózdelip otyrǵany habarlanǵan. Alaıda áleýmettik jelide kóptegen adam ata zańǵa N.Nazarbaevty táýelsiz Qazaqstannyń negizin qalaýshy dep jazýǵa qarsy shyǵatyndaryn jazǵan.

Keshe memlekettik hatshy Erlan Karın atalǵan ózgeristerdi jasaýshy jumys toby "tuńǵysh prezıdenttiń róli onsyz da belgili, ony jeke túrde konstıtýsıaǵa engizý qajet emes" dep pikir bildirgenderin málim etken. Konstıtýsıalyq keńes usynys konstıtýsıaǵa qaıshy kelmeıdi dep qorytyndy shyǵarǵan.

Derekkóz: KazTAG