Májilistiń jalpy otyrysynda palata depýtattary senattyń "Referendým týraly" Zańnan Elbasy týraly normany alyp tastaǵanyn maquldady. Bul týraly QazAqparat agenttigi habarlady.
– Bul Konstıtýsıalyq zań jobasyn Qazaqstan Respýblıkasy parlamentiniń depýtattary ázirledi. Ózderińizge belgili, zań jobasyn bıyl 4 mamyr parlament májilisi maquldap, senattyń qaraýyna jibergen bolatyn. Zań jobasyn senatta qaraý barysynda qosymsha tolyqtyrý engizildi. Bul tolyqtyrý Komıtet otyrysynda qaraldy. senat, respýblıkalyq referendýmnyń nysanasy bola almaıtyn máselelerdi naqtylaý maqsatynda, "Respýblıkalyq referendým týraly" Konstıtýsıalyq zańnyń 3-baby 2)-tarmaqshasyn jańa redaksıada usynyp otyr. Atap aıtatyn bolsaq, "memlekettiń táýelsizdigin, Respýblıkanyń birtutastyǵy men aýmaqtyq tutastyǵyn, ony basqarý nysanyn, Respýblıka qyzmetiniń túbegeıli qaǵıdattaryn ózgertý» máseleleri referendým talqysyna qoıylatyn máseleler bola almaıdy, – dedi májilistiń Zańnama jáne sot-quqyqtyq reforma komıtetiniń tóraǵasy Arman Qojahmetov.
Onyń aıtýynsha, osy tarmaqshanyń qoldanystaǵy redaksıadaǵy "Táýelsiz Qazaqstannyń Negizin salýshy, Qazaqstan Respýblıkasynyń Tuńǵysh Prezıdenti – Elbasy irgesin qalaǵan Respýblıka qyzmetiniń túbegeıli prınsıpterin jáne Qazaqstan Respýblıkasynyń Tuńǵysh Prezıdenti – Elbasynyń mártebesin ózgertý" degen sózderdi parlament senaty alyp tastaýdy usynǵan.
Osylaısha, "Respýblıkalyq referendým týraly" Qazaqstan Respýblıkasynyń Konstıtýsıalyq zańyna ózgerister men tolyqtyrý engizý týraly" Konstıtýsıalyq zań jobasyna parlament senaty engizgen tolyqtyrýdy palata otyrysyna qatysqan 96 depýtattyń barlyǵy qoldady.
Qujat prezıdenttiń qol qoıýyna jiberiledi.
Pikir qaldyrý