"Vladımır Pýtın Ýkraınada uzaq soǵysqa daıyndalyp jatyr. Tipti Ýkraınanyń shyǵysynda jeńiske jetse de, soǵysty toqtatpaıdy" dep eskertti AQSH barlaý qyzmeti. Bul týraly Nú-Iork Taıms gazeti habarlady.
Reseı Ýkraınanyń shyǵysyn basyp alý úshin keskilesken urysty jalǵastyryp jatyr. Ýkraına Reseıdiń Kıevti basyp alý áreketine toıtarys bergen soń Máskeý áskerin Donbass aımaǵyn basyp alýǵa qaıta baǵyttady.
"Biraq soǵan qaramastan, reseılik kúshter áli de tyǵyryqqa tirelip jatyr" deıdi AQSH barlaý qyzmeti.
AQSH ulttyq barlaý departamentiniń dırektory Avrıl Heıns seısenbi kúni AQSH Senaty komıtetiniń tyńdaýynda Pýtın áli de Donbastan tys jerlerde áskerı maqsattarǵa qol jetkizýge nıetti ekenin, biraq onyń ambısıasy men Reseıdiń qazirgi áskerı áleýeti arasynda sáıkessizdik kórinktinin aıtady.
Onyń aıtýynsha, Pýtın AQSH pen EO-nyń Ýkraınany qoldaýyn da eseptep otyrǵan bolýy múmkin.
Reseı prezıdenti soǵysty jalǵastyrýda túbegeıli basqasha sheshimderge júginýi yqtıal ekeni de habarlandy. Máskeý "Pýtın Reseıge aıqyn qaýipti sezingen jaǵdaıda ǵana ıadrolyq qarýdy qoldanady" dep málimdegen.
AQSH qorǵanys barlaý agenttiginiń dırektory Skott Berrıer sol tyńdaýda reseılikter men ýkraındar "azdap tyǵyryqqa tirelgenin" aıtty.
Sońǵy shaıqastarda Ýkraına soltústik-shyǵystaǵy Harkov oblysyndaǵy tórt eldimekendi qaıtaryp alǵanyn habarlaǵan.
Ýkraına qarýly kúshteri Reseıden Cherkasıı Tyshkı, Rýskı Tyshkı, Rýbıjne jáne Baırakty qaıtaryp alǵanyn da málimdedi.
Ýkraına prezıdenti Vladımır Zelenskıı ýkraınder reseılik kúshterdi Harkovten birte-birte yǵystyryp jatqanyn aıtty.
"Odessa portynda túnde zymyran birneshe ǵımaratqa tıip, jaqyn mańdaǵy úılerdi teńseltti. Bir adam qaza taýyp, bes adam jaralandy" dep habarlady Ýkraına qarýly kúshteri.
