Májilis depýtattarynyń aımaqtarǵa sapary búgin Aqmola, Almaty, Mańǵystaý, Jetisý oblystarynda jalǵasty.

«AMANAT» partıasy fraksıasynyń músheleri  – Asqarbek Úısimbaev,  Iýlıa Kýchınskaıa, Mádı Elýbaev Býrabaı aýdanynyń Kindikqaraǵaı aýylyndaǵy sút-taýarly fermasynyń eńbek ujymymen kezdesti.

Onda halyq qalaýlylary saılaýshylarǵa referendýmnyń mán-mańyzyn túsindirdi.

Depýtattardyń aıtýynsha, bul naýqan «Jańa Qazaqstan» qurý jolyndaǵy alǵashqy naqty ári batyl qadam. Óıtkeni, memlekettik qurylystyń quqyqtyq negizin quraıtyn Ata Zańymyzǵa engiziletin ózgerister halyq talqysyna shyǵarylyp, barsha qazaqstandyqtardyń oı-pikirin eskere otyryp, qabyldanǵaly otyr.

– Biz bolashaq damý jolymyzdy búkil el bolyp birlese sheshkeli otyrmyz. Bul qadam el erteńi úshin árbir azamattyń oı-pikiriniń qanshalyqty  mańyzdy ekenin, jańa memleket qurýda óziniń de úles salmaǵy baryn sezinýge múmkindik beredi. Sondyqtan ortaq umtylysymyzdyń nátıjeli bolatynyna esh kúmán joq, – dedi depýtat Asqarbek Úısimbaev.

Depýtattar ózgeretin 33 baptyń árqaısysyna toqtalyp, ásirese, prezıdent pen parlament ókilettigindegi jańashyldyqtarǵa aıryqsha nazar aýdardy.  

Óz kezeginde, kezdesýge qatysqan ferma qyzmetkerleri referendýmdy qoldaıtyndyqtaryn aıtty.

– Biz prezıdentimizdiń «Jańa Qazaqstan» qurý baǵytyndaǵy barlyq bastamalaryn bilemiz. Búgin osy taqyryp tóńireginde mazmundy ári áserli áńgime boldy. Biz shaǵyn ujym bolsaq ta referendýmǵa atsalysyp, daýys beremiz. Prezıdentti qoldaımyz, – dedi mal dárigeri Beısenbaı Ahmetov.

Al májilis depýtattary – Edil Jańbyrshın men Samat Musabaev Munaıly aýdanynyń jurtshylyǵymen kezdesti.

Jıynda depýtattar referendýmnyń mańyzdylyǵyna toqtala kele, halyq daýsynyń sheshýshi ról atqaratynyn, oǵan ár azamattyń atsalysýy kerektigin atap ótti.

– Referendýmǵa qatysyp, konstıtýsıalyq reformalardy qoldaýymyz kerek. Ol bizdiń júrek qalaýymyzben úndes. Sondyqtan turǵyndar onyń mán-mańyzyn jete túsine bilýi qajet, – dedi ardager Qalnıaz Ońdabaev.

Almaty oblysy Qarasaı aýdanynda májilis depýtattary Danıar Álimbaev pen Maqpal Tájmaǵanbetova da halyqpen júzdesti. Oǵan aýdan aqsaqaldary, qoǵamdyq pikir kóshbasshylary, densaýlyq saqtaý, bilim berý uıymdary, kásipodaqtar ókilderi men jýrnalıser qatysty.

Halyq qalaýlylarynyń pikirinshe, el taǵdyryn anyqtaıtyn reformalarǵa tek depýtattar ǵana emes, búkil halyq atsalysýy qajet.

Jetisý oblysynda «Aq jol» demokratıalyq partıasy fraksıasynyń jetekshisi Azat Perýashev birqatar kezdesý ótkizdi.

Sapar barysynda depýtat Qapal-Arasan aýylyndaǵy Barlybek Syrttanuly atyndaǵy mektepte kórnekti saıası qaıratker, aǵartýshy Barlybek Syrttanuly músininiń ashylýyna qatysty. Onda B.Syrttanulynyń ustanymdarymen úndes keletin qazirgi prezıdent reformalarynyń mańyzdy tustaryn aıtyp, jınalǵan qaýymdy referendýmǵa atsalysýǵa shaqyrdy.

Odan keıin depýtat «Qaınar» JSHS-niń Taldyqorǵandaǵy qorǵasyn batareıalary zaýytynda boldy. Kásiporyn elektrotehnıka salasynda da, Jetisý óńirinde de eń tabysty kásiporyndardyń biri. Depýtat onda ınjenerlik-tehnıkalyq qyzmetkerlermen áńgimelesip, konstıtýsıalyq reforma jaıyn talqylady.

Parlament májilisi apparatynyń baspasóz qyzmeti