Arystanbek Muhamedıuly qaı salada jumys jasasa da áýeli ult múddesi úshin ter tókkenin, memleket búdjetine qol salǵandarǵa aıaýsyz tosqaýyl jasaǵanynan ózine jaý taýyp alǵanyn, solar aıaqtan shalýǵa tyrysyp jatqanyn aıtady.

 

Sózinshe, sondaı "jaýlardyń" birazy "Fenıks" fılmi tóńiregindegi daýdan keıin paıda bolǵan.

 

"Osydan birneshe jyl buryn "Fenıks" kórkemfılminiń túsirilimderine bólingen qarajattyń jymqyrylǵany belgili. Naqtylap aıtqanda, "Fenıks" kınojobasy boıynsha búdjet qarjysyn jymqyrdy degen kúdik keltirilip, kınorejısser Talǵat Janybekov qamaýǵa alyndy. Oǵan qazaqstandyq belgili akter ári prodúser Tuńǵyshbaı Jamanqulovtyń da tikeleı qatysy bolatyn. "Fenıks" fılminiń sharty gollıvýd kompanıasy "Aldamisa Entertainmentpen" jasalyndy degen sóz jalǵan bolyp shyqqan edi. Shyn máninde, "Kazahfılm" AQ "T.K.TURAN UNIVERSAL BUSSINES" JSHS-pen jáne reseılik OOO "Aldamısa RÝS" jasandy kompanıasymen kelisim jasalyp, búdjetten bólingen 3 mln dollar qoldy bolyp kete jazdaǵan. Sol T. Jamanqulov óz qorǵaýshysynyń kózinshe "Fenıks" fılminiń óndirisine bólingen búdjet qarajatyn jymqyrǵanyn tolyqtaı moıyndady. Jamanqulov qarajattyń qolma-qol aqshaǵa aınaldyrylǵan deregin de rastady jáne búdjet qarajatynyń jeke maqsattarǵa jumsalǵanyn aıtty. Alaıda, atalǵan óner ókilderi túrli aıla-sharǵylarymen meni qaralaýǵa kóshken bolatyn. Prodússer Tuńǵyshbaı Jamanqulov aıybyn betine basqanym úshin, meni ata jaýyndaı kórip, kúni búginge deıin jón-josyqsyz aryzdanyp keledi" deıdi ol.

 

Arystanbek Muhamedıuly "óziniń sońyna túsip alǵandardyń artynda Darıǵa Nazarbaeva, Baǵlan Maılybaev, Ermek Amanshaev tur" dep sanaıdy.

 

"Álbette, qısapsyz tekserý, tergeý amaldary da júrdi. Biraq, meniń ar-ujdanym taza! Jeke basymdy qaralaǵan birde-bir fakt dáleldenbedi. Keıingi kezde, endi aryz ıeleri mýzeıde ketken buryńǵy kinárattardy da maǵan japsyra salǵysy keledi. Osyǵan oraı, negizsiz tekserýlerge tosqaýyl bolýyńyzdy suraımyn!" deıdi Ulttyq mýzeı dırektory.

 

Búgin jýrnalıs Mıhaıl Kozachkov telegram kanalynda sybaılas jemqorlyqqa qarsy qyzmet Ulttyq mýzeıdiń shyǵyndaryn tekserip jatqanyn, olardy "Altyn adamnyń álem mýzeılerine sherýi" kórmesin ótkizý kezindegi shyǵyndar qyzyqtyratynyn jazǵan. Jýrnalıs antıkor mýzeı men Arystanbek Muhamedıulynyń úıin tintigenin, Muhamedıuly týystarynyń aktıvterin tekserip jatqanyn jazǵan.