Nur-Cultan qalasy boıynsha Cybaılas jemqorlyqqa qarsy qyzmet Mádenıet jáne sport mınıstrligine qarasty Ulttyq mýzeıiniń laýazymdy tulǵalaryna qatysty tergeý júrgizip jatyr. Bul týraly sybaılas jemqorlyqqa qarsy qyzmet baspasóz qyzmeti málim etti.

Antıkor habarlamasynda, buǵan deıin jýrnalıs Mıhaıl Kozachkov jazǵandaı tergeý "Altyn adamnyń álem mýzeılerine sherýi" halyqaralyq kórmesine qatysty júrip jatqany aıtylady.

"Kórmeni ótkizý boıynsha Memlekettik satyp alý týraly shart aıasynda 146 mln teńge somasynda búdjet qarajatyn jymqyrý belgileri boıynsha sotqa deıingi tergeý júrgizýde. Sharttyń jalpy somasy 1,2 mlrd teńgeni quraıdy. Tergeý sotynyń sanksıasymen qazirgi ýaqytta tintý, sondaı-aq kýálardan jaýap alý jáne basqa da tergeý áreketteri júrgizilýde. İs boıynsha túpkilikti sheshim qylmystyq is júrgizý zańnamasynyń talaptaryn oryndaý nátıjeleri boıynsha qabyldanatyn bolady" delingen habarlamada.

Antıkor kúdikke alynǵan tulǵalardyń aty-jónin jarıalaǵan joq. Biraq Mıhaıl Kozachkov tergeý Ulttyq mýzeı dırektory Arystanbek Muhamedıulyna qatysty júrip jatqanyn jazǵan. Sondaı-aq búgingi Arystanbek Muhamedıulynyń prezıdentke úndeý joldaýy onyń quzyrly organ nazaryna ilingenin bildirdi. Ol ózine qatysty tekseris negizsiz júrip jatqanyn málimdep, prezıdentten tekseristi toqtatýǵa yqpal etýdi suraǵan. Ol qaı salada jumys jasasa da áýeli ult múddesi úshin ter tókkenin, memleket búdjetine qol salǵandarǵa aıaýsyz tosqaýyl jasaǵanynan ózine jaý taýyp alǵanyn, solar aıaqtan shalýǵa tyrysyp jatqanyn aıtady.