Aqtóbe oblysyna is-saparyn shalǵaı aýyldardan bastaǵan májilis depýtattary, «AMANAT» partıasynyń respýblıkalyq shtabynyń músheleri Ǵalymjan Eleýov, Amanǵalı Berdalın «Qazhrom» Ultaralyq Kompanıasy» Aqtóbe feroqorytpa zaýytyna bardy.

Onda depýtattar zaýyt ujymymen Konstıtýsıanyń el damýyndaǵy rólin jáne jańa Qazaqstandy qurýdaǵy konstıtýsıalyq reformanyń mańyzdylyǵyn talqylady.

Ǵalymjan Eleýov konstıtýsıalyq reforma qoǵamdy demokratıalandyrýdyń shynaıy qadamy ekenin aıtty. Depýtattyń pikirinshe, referendým sýperprezıdenttik modelden prezıdenttik respýblıkaǵa túpkilikti kóshý, birqatar bılik ókilettikterin qaıta bólý, Parlamenttiń róli men mártebesin kúsheıtý, halyqtyń eldi basqarýǵa qatysýyn keńeıtý, azamattardyń quqyqtaryn qorǵaýdyń konstıtýsıalyq tetikterin kúsheıtý sıaqty irgeli ózgeristerge jol ashady.

Óz kezeginde, Amanǵalı Berdalın referendýmdy óte mańyzdy saıası oqıǵa retinde qaraýǵa shaqyrdy.

Kezdesý barysynda ujym qyzmetkerleri referendýmǵa qoldaý bildirip, zańǵa engizilgen tolyqtyrýlar men túzetýlerdiń durys ekenin aıtty.

– Ata Zańǵa engiziletin túzetýler qatarynda jerdi, onyń qoınaýyn, sýdy, ósimdikter men janýarlar dúnıesin, basqa da tabıǵı resýrstardy halyq menshigi dep jarıalaý qarastyrylǵan. Meniń kókeıime qonǵan osy ózgeristerdi zańmen bekitý úshin referendýmǵa baramyn. Óıtkeni bul bizdiń daýsymyzben, sheshimimizben júzege asyrylady, – dedi kompanıadaǵy bastaýysh partıa uıymynyń tóraǵasy Amanjol Úmbetov.

Sonymen qatar jıynda ujym músheleri zeınet jasyn tómendetý múmkindigi týraly óz usynystaryn jáne basqa da birqatar ózekti máseleni jetkizdi.

Aıta ketý kerek, májilis depýtattary Sergeı Sımonov, Ǵalymjan Eleýov, Amanǵalı Berdalın buǵan deıin Oıyl, Muǵaljar, Qarǵaly, Qobda, Hromtaý, Áıteke bı aýdandarynda boldy.

"AMANAT" partıasynyń Aqtóbe oblystyq fılıaly