SHQO da 2021 jyly bilim berý obektilerin salýǵa jáne materıaldyq-tehnıkalyq bazany nyǵaıtýǵa barlyǵy 13,1 mlrd teńge baǵyttaldy. Bilim ordalarynyń materıaldyq-tehnıkalyq bazasyn jaqsartýa erekshe kóńil bólinýde. Bul týraly oblystyq máslıhattyń kezekti XV sesıasynda SHQO ákimi Danıal Ahmetov málim etti.
Onyń aıtýynsha, Óskemen qalasyndaǵy tehnologıalyq kolej ben Qurylys kolejine arnalǵan 9 qabatty eki jataqhana ǵımaratynyń qurylysy aıaqtalýǵa jaqyn.
– 3 jastan 6 jasqa deıingi balalardy mektepke deıingi tárbıemen qamtamasyz etý máselesi 100% sheshimin tapqan. Óskemen jáne Zaısan qalalarynda shaǵyn ortalyq jáne 1220 oryndyq 7 jekemenshik balabaqsha ashý esebinen 2 jastan 6 jasqa deıingi balalardy mektepke deıingi uıymdarmen qamtamasyz etý 8%-ǵa ósip, 97,5%-dy qurady. Barlyq bilim berý uıymdarynda erekshe bilim berilýine qajettiligi bar balalardy ınklúzıvti oqytý úshin jaǵdaı jasalǵan. Kóp balaly jáne az qamtylǵan otbasylardan shyqqan balalardy qoldaý ádettegideı basymdyqqa ıe bolyp otyr, – dedi aımaq basshysy.
Jyl saıyn jappaı oqytý qorynyń kólemi ulǵaıyp keledi. Ótken jyly tegin tamaqpen, mektep formasymen, aıaq kıimmen qamtamasyz etýge oblystyq búdjetten 3,5 mlrd teńge bólingen.
– Eńbek resýrstaryn daıyndaý máselesine kózqaras aıtarlyqtaı ózgerdi. "Jas Maman" jobasy boıynsha 11 quzyrettilik ortalyǵy ashyldy. Az qamtylǵan otbasylardan shyqqan balalardy qoldaý ári joǵary bilimdi mamandar daıarlaý boıynsha áleýmettik qoldaý jalǵasyn taýyp jatyr. Búdjettik granttar alǵan stýdentter sany 65%-ǵa artqan, – dedi oblys ákimi jıyn barysynda.
Pikir qaldyrý