«AMANAT» partıasynyń atqarýshy hatshysy Asqat Oralov Atyraý oblysynda munaı óndirý kásipornynyń ujymymen, balyq sharýashylyǵy salasynyń kásipkerlerimen, jastarmen jáne partıa aktıvimen birqatar kezdesý ótkizdi.

Asqat Oralov Isataı aýdanyndaǵy munaı óndirýshi kásiporyndardyń biriniń ujymymen kezdesip, Konstıtýsıaǵa ózgerister men tolyqtyrýlar engizý jónindegi aldaǵy referendýmnyń mańyzyn talqylady. Ol aldaǵy reformalar árbir azamatqa qatysty ekenin, sondyqtan árkim referendýmǵa qatysyp, eldiń odan ári damýyna óz úlesin qosýy tıis ekenin atap ótti.

«Konstıtýsıa 1995 jyly qabyldandy, sodan beri ózgerister parlament arqyly engizildi. prezıdent halyqqa Joldaýynda aýqymdy saıası reformalar baǵytyn jarıalady jáne olardy qabyldaýdyń aıryqsha quzyretin halyqqa usyndy. Sondyqtan 5 maýsymda bárimiz daýys berýge qatysyp, azamattyq boryshymyzdy oryndaýymyz kerek», dedi Asqat Oralov.

Kezdesý barysynda aýdan munaıshylary referendým ótkizý qajettiligin qoldap, birqatar túıitkildi máselelerdi de alǵa tartty. Atap aıtqanda, Atyraý-Astrahan avtojolyn jóndeý jumystarynyń uzaqqa sozylýy, Jaıyq ózeni jaǵdaıynyń nasharlaýy sıaqty máseleler kóterildi.

Óz kezeginde, aýdan jastarynyń biri Arystanbek Ǵazızov referendým árbir azamattyń pikirin eskerýge múmkindik beretinin atap ótti.

«Bizdiń munaıly ólkeniń jastary memleket basshysy Qasym-Jomart Toqaevtyń bastamalaryn tolyq qoldaıdy jáne men barlyq jastar 5 maýsymda saılaý ýchaskelerine kelip, azamattyq ustanymyn kórsetetinine senimdimin», dedi Arystanbek Ǵazızov.

Budan soń partıanyń atqarýshy hatshysy balyq sharýashylyǵy sektorynyń kásipkerlerimen kezdesip, salany damytýdyń bolashaǵy men referendýmǵa qoıylǵan Ata Zańǵa ózgerister men tolyqtyrýlar engizýdiń mańyzdylyǵyn talqylady. Búgingi tańda Jaıyq-Kaspıı baseıninde kásiptik balyq aýlaýmen aınalysatyn 18 iri kásiporyn jumys isteıdi. Jalpy, bul salada 20 myńǵa jýyq adam jumyspen qamtylǵan.

«Zańdarǵa referendým arqyly ózgeris engizý bıliktiń ashyqtyǵyn, mańyzdy sheshimder qabyldaǵan kezde árbir azamattyń pikirin eskerýge nıetti ekenin kórsetedi. Árbir qazaqstandyq óz tarapynan óziniń azamattyq quqyǵyn paıdalanyp, daýys berýge qatysýǵa tıis», dep atap ótti kezdesý barysynda balyq ónimderin óndirý zaýytynyń basshysy Aıgúl Ámirǵalıeva.

Atyraý qalasynda Asqat Oralov «Bereke» shaǵyn aýdanyndaǵy 290 oryndyq balabaqsha qurylysynyń barysymen tanysty.

Mektepke deıingi mekeme ótken jyldyń sońynda paıdalanýǵa berilýi kerek edi, biaq qarjylandyrýdyń azdyǵynan qurylys uzaqqa sozyldy. Bul másele partıalyq baqylaýǵa alyndy jáne balabaqsha jyl sońyna deıin paıdalanýǵa beriledi.

Sondaı-aq, Asqat Oralov aımaqtaǵy «AMANAT» belsendilerimen jáne partıa jastar qanatynyń múshelerimen kezdesti. Oblysta 106 bastaýysh partıa uıymyna birikken 24 myń partıa múshesi bar.