Májilis Tóraǵasy Erlan Qoshanov referendýmnyń mán-mańyzyn túsindirý úshin jumys saparymen Shyǵys Qazaqstan oblysyna bardy. Aldymen Semeı qalasynda bolyp, óńir jurtshylyǵymen kezdesti.

Erlan Qoshanov jıyn barysynda Memleket basshysy Qasym-Jomart Toqaevtyń bastamasymen qazir elimizde aýqymdy ózgerister bolyp jatqanyn aıtyp, óńir halqyn Abaı oblysynyń qurylýymen quttyqtady.

Semeı – Alash arystarynyń basyn qosqan qazaq rýhanıatynyń qara shańyraǵy. Sondyqtan tarıhı turǵydan qaraıtyn bolsaq, aýmaqtyq jaǵynan, halyq sany jaǵynan alsaq ta, ádil sheshim boldy dep oılaımyn. Endeshe, sizderdi sol tarıhı ádilettiliktiń ornaýymen shyn júrekten quttyqtaımyn, – dedi Palata Spıkeri.

Májilis tóraǵasynyń aıtýynsha, Prezıdenttiń Abaı oblysyn qurý týraly sheshimi aımaqtyń odan ári  órkendeýine tyń serpin beredi. Jańa jumys oryndary ashylyp, ınvestısıa tartylady jáne kásipkerliktiń damýyna jańa múmkindikter paıda bolady.

Abaı óńiri, Semeı jeri tarıhtyń jańa paraǵyn ashty. Biz Abaı oblysynyń shańyraǵyn halqymyzben, Prezıdentimizben birge kóteremiz. Osy iste Parlament Májilisi, «AMANAT» partıasy da sizdermen birge bolady, – dedi Májilis Spıkeri.

Erlan Qoshanov el taǵdyryn aıqyndaıtyn úlken maqsat-mindetterge toqtalyp, ol jalpyhalyqtyq referendýmnan bastalatynyn atap ótti. Májilis Tóraǵasy jınalǵan qaýymǵa Memleket basshysy reformalarynyń mán-mańyzyn túsindirip, «Jańa Qazaqstannyń» keleshek kelbeti jaıly óz oıymen bólisti.

Rasymen de, Jańa Qazaqstan degenimiz ne? Qazir eń jıi qoıylatyn suraq osy. Prezıdent jýyrda buǵan naqty jaýap berdi. «Ol – Ádiletti Qazaqstan» dep dóp basyp aıtty. Al «jańa qazaqstandyq» qandaı bolýy qajet? Muny osy topyraqta týǵan uly Abaı 1 jarym ǵasyr buryn aıtyp ketken. Ol – bes nárseden qashyq bop, bes nársege asyq bolýy kerek. Qarap otyrsańyzdar, Abaı fılosofıasy Prezıdentimizdiń «Jańa Qazaqstan» týraly kózqarasymen tolyq úndesip tur. Sondyqtan jastardy bilimge, eńbekke baýlý, osy bes qasıetti boıyna sińirý mańyzdy, – dedi Palata Spıkeri.

Erlan Qoshanov Prezıdent reformalarynyń jańa múmkindikterge jol ashatynyn aıtyp, aldaǵy ýaqytta Parlamenttiń róli kúsheıetinine, elimizdiń saılaý júıesine de birqatar ózgerister bolatynyna mán berdi. Ásirese, ákimder saılaýy – kópshilikti qyzyqtyratyn taqyryptardyń biri.

– Bul taqyryp el arasynda jıi aıtylyp júr. Biz oǵan kezeń-kezeńmen kele jatyrmyz. Byltyr elimizde 1 myńǵa jýyq aýyl ákimin halyqtyń ózi saılady. Keler jyly aýdan ákimderin saılaýǵa kirisemiz. Aldaǵy kezeńderde búkil aýyl, aýdan, qala ákimderi halyqpen tikeleı saılanatyn bolady. Oblys basshylaryn taǵaıyndaý máselesine keler bolsaq, buryn Prezıdent usynǵan jalǵyz kandıdat 20-30 oblystyq máslıhat depýtatymen kelisiletin. Endi Memleket basshysy tarapynan kem degende eki úmitker usynylady. Ony barlyq deńgeıdegi máslıhattar, aýdan, qala, oblys depýtattary tańdaıtyn bolady, – dedi Májilis Tóraǵasy.

Jıynda oblystyń qoǵam ókilderi sóz sóılep, Memleket basshysynyń referendým ótkizý jónindegi bastamasy men barlyq reformalardy qoldaıtyndyqtaryn aıtty.

Odan ári Májilis Tóraǵasy Semeı qalasyndaǵy Jedel medısınalyq járdem aýrýhanasy ujymymen kezdesti, elimiz boıynsha qabyrǵa materıaldaryn shyǵaratyn iri kásiporyndardyń biri  «Sılıkat»  zaýytynda bolyp, jumysshylarmen áńgimelesti. Sondaı-aq, múgedekterge arnalǵan 150 oryndyq ońaltý ortalyǵynyń qurylysymen tanysty.

Sapar barysynda Erlan Qoshanov Abaı aýdanyndaǵy Qaraýyl aýylyna baryp, jurtshylyqpen kezdesti. Onda Prezıdent bastamalarynyń mán-mańyzdylyǵyn túsindirip, aýyl zıalylary men turǵyndarynyń pikirin tyńdady.

–  Elimizde Qaraýyldy bilmeıtin qazaq joq shyǵar. Bul – adamzatqa ǵulama Abaıdy syılaǵan qasıetti topyraq. Osynda sizdermen júzdeskenime qýanyshtymyn. «Jańa Qazaqstan» qurýǵa baǵyttalǵan Memleket basshysynyń saıası reformalary tóńireginde ózderińizben áńgimelesý úshin arnaıy keldim. Prezıdent el taǵdyryn – qalyń jurttyń ózi sheshkenin qalap otyr. Osynaý jaýapty kezeńde halyq pen bılik birtutas bolýymyz kerek. Osy joldy Memleket basshysyna qoldaý bildirip, referendýmǵa bir kisideı atsalysýǵa, tarıhı tańdaý jasaýǵa shaqyramyn, – dedi Palata Tóraǵasy.

Kezdesýge kelgen zıaly qaýym ókilderi Abaı aýdany jurtshylyǵynyń reformalardy jaqsy qabyldap jatqanyn jáne onyń mańyzyn eskere otyryp, aldaǵy referendýmǵa atsalysatyndaryn aıtty.

– Bul reformalardyń bári halyqtyń kókeıinde júrgen suraqtarǵa jaýap beredi. Biz ony jaqsy túsinemiz. Eldiń ıesi, jerdiń ıesi – halyq degen sóz júregimizge jaqyn tıdi. Prezıdentimiz jumysqa kirisken kúnnen bastap osy demokratıalyq prosesterdiń júzege asýyn sóz etip júr. Biz ony tolyq qoldaımyz, – dedi Abaı aýdanynyń qurmetti azamaty Amantaı Muqataev.

Kezdesý sońynda jınalǵandar Prezıdentke Abaı oblysynyń qurýǵa uıtqy bolǵany úshin kúlli aýdan atynan shynaıy alǵys aıtty.

– Oblysymyz qurylyp jatyr. Zor maqtanyshpen, úlken úmitpen qarap otyrmyz. Prezıdentimiz Qasym-Jomart Kemelulyna bizdiń sálemimizdi jetkizińiz. Abaılyqtar men Abaı urpaqtary sheksiz alǵysyn bildiredi. Óńirimizdiń gúldenýine bárimiz bir kisideı atsalysamyz, – dedi Abaı aýdanynyń qurmetti azamaty Tólegen Janǵalıev.

Sonymen qatar Májilis Tóraǵasy Qaraýylda ornalasqan Abaı atyndaǵy mektep-gımnazıasyn aralap, muǵalimdermen jáne oqýshylarmen kezdesti.

Májilistiń baspasóz qyzmeti