Telegramchattarda 5 maýsymda ótetin respýblıkalyq referendým barysynda Nursultan Nazarbaev otbasynyń barlyq múshelerine qol suǵylmaýshylyqqa kepildik beretin jáne azamattardyń salyqtary esebinen olardy ómir boıy asyraýǵa múmkindik beretin túzetýler qabyldanatyny týraly aqparat tarady. Ádilet mınıstrligi aqparattyń jalǵan ekenin habarlady, dep jazady Stopfake saıty.

Ádilet mınıstrliginiń málimetinshe, tuńǵysh prezıdent mártebesine qatysty konstıtýsıaǵa engiziletin túzetýler jobasyna sáıkes úsh normany ózgertý usynylǵan:

1) 42-baptyń 5-tarmaǵynyń ekinshi bóligi alyp tastalady (bir adam qatarynan eki retten artyq respýblıka prezıdenti bolyp saılana almaıdy. Bul shekteý Qazaqstan Respýblıkasynyń tuńǵysh prezıdentine qoldanylmaıdy)

2) 46-baptyń 4-tarmaǵy alyp tastalady. Onda tuńǵysh prezıdenttiń mártebesi men ókilettikteri respýblıka konstıtýsıasymen jáne konstıtýsıalyq zańmen aıqyndalatyny jazylǵan. Qazirgi ýaqytta tuńǵysh prezıdenttiń quqyqtyq mártebesi "Qzaqstan Respýblıkasynyń Tuńǵysh Prezıdenti – Elbasy týraly" jeke konstıtýsıalyq zańmen retteledi. Tuńǵysh Prezıdentke jáne onymen birge turatyn otbasy múshelerine jeke menshik quqyǵymen tıesili múlikke qol suǵylmaýshylyq atalǵan Konstıtýsıalyq zańda belgilengen. Óz kezeginde, atalǵan norma Konstıtýsıadan alyp tastalǵan jaǵdaıda, Qazaqstan Respýblıkasynyń zańnamasyn Konstıtýsıa normalaryna sáıkes keltirý úshin osy zańdy joıý qajet bolady.

3) Tuńǵysh prezıdenttiń atalýy Konstıtýsıanyń 91-babynyń 2-tarmaǵynan alyp tastalady (Konstıtýsıada belgilengen memlekettiń táýelsizdigi, Respýblıkanyń birtutastyǵy men aýmaqtyq tutastyǵy, ony basqarý nysany, sondaı-aq táýelsiz Qazaqstannyń Negizin salýshy, Qazaqstan Respýblıkasynyń Tuńǵysh Prezıdenti – elbasy irgesin qalaǵan Respýblıka qyzmetiniń túbegeıli prınsıpteri jáne Qazaqstan Respýblıkasynyń Tuńǵysh Prezıdenti – Elbasynyń mártebesi ózgermeıdi).

"Joǵaryda aıtylǵandardy qorytyndylaı kele, Konstıtýsıaǵa engiziletin túzetýler jobasy Qazaqstan Respýblıkasynyń Tuńǵysh Prezıdentine jáne onyń otbasyna jańa kepildikter berýdi kózdemeıtinin habarlaımyz. Kerisinshe, Konstıtýsıaǵa ózgerister engizý týraly zań jobasynda Tuńǵysh Prezıdent mártebesine qatysty barlyq normalardy alyp tastaý usynyldy" delingen mınıstrliktiń StopFake.kz-tiń saýalyna bergen jaýabynda.