Qazaqstandyq ǵalymdar arterıalyq patologıalardy emdeýdiń jańa ádisterin oılap tapty. Bulaı dep bilim jáne ǵylym mınıstrligi habarlady.
Ǵalymdardyń pikirinshe, tásil mıokard ınfarktisinen, ınsýlttan, trofıkalyq jaralardan, tómengi aıaqtyń gangrenasynan, sondaı-aq basqa da múshelerdiń múgedektigi men ólimdi azaıtady.
Ál-Farabı atyndaǵy Qazaq ulttyq ýnıversıtetiniń Qan tamyrlary patologıasy ortalyǵynyń qyzmetkerleri arterıalyq tamyrlardyń ótkizgishtigin qalpyna keltirýge arnalǵan qurylǵylar men ádisterge Qazaqstan Respýblıkasynyń eki patentin jáne Eýrazıalyq patenttik vedomstvonyń eki patentin alǵan.
– Bizdiń ónertabystarymyz "Arterıalyq tamyrlardyń ótkizgishtigin qalpyna keltirýge arnalǵan qurylǵy jáne ádis" jáne "Aterosklerotıkalyq bláshkalardy selektıvti últradybystyq dısseksıaǵa arnalǵan qurylǵy jáne arterıalyq tamyrlardyń ótkizgishtigin qalpyna keltirý ádisi" dep atalady. Emdeý ádisi mynadaı: biz arterıalarda jabyq qýys jasap, arterıa arqyly qan aǵyp jatqan kezde aterosklerotıkalyq bláshkalardy preparatpen eritemiz. Bul ónertabystar aterosklerotıkalyq bláshkalardy túbegeıli joıýǵa jáne birden birneshe arterıalardy tazalaýǵa múmkindik beredi, – deıdi ál-Farabı atyndaǵy QazUÝ Qan tamyrlary patologıasy ortalyǵynyń dırektory Oralbaı Dármenov.
Mınıstrlik málimdemesinde, bul qurylǵylardy qoldaný qan tamyrlaryn stentteý, sondaı-aq ómirlik mańyzdy músheler, ıaǵnı júrek, mı, tómengi aıaq arterıalary jáne t.b. tamyrlaryna ashyq shýnttaýshy operasıalar sıaqty belgili jáne kúrdeli ádistermen salystyrǵanda emdeýdiń salystyrmaly túrde tıimdi boljamdary men sapasyn beretini aıtylady.
– Jyl saıyn álemde stentter 60 mlrd dollarǵa satylady, biz usynatyn emdeý ádisi áldeqaıda arzanyraq bolady. Bizdiń ónim tehnıkalyq ta, quny jaǵynan da jaqyn analogtardan birneshe ese asyp túsedi, – deıdi profesor Oralbaı Dármenov.
Mınıstrlik ǵalymdar qazirgi tańda klınıkalyq synaqtar men komersıalyq óndiriske arnalǵan qurylǵylardyń zerthanalyq jáne óndiristik úlgilerin jasaýmen aınalysyp jatqanyn atap ótti.
Pikir qaldyrý