Qazaqstanda maımyl sheshegin juqtyrǵan adam joq. Dese de densaýlyq saqtaý mınıstri Ajar Ǵınıat azamattarǵa Afrıka elderine ázirge saıahattamaýǵa keńes berdi, dep jazady Sputnik Qazaqstan saıty.
Mınıstr el shekarasvn kesip ótken barlyq adamnyń dene qyzýy tekseriletinin atap ótti. Eger temperatýrasy bolsa, dereý oqshaýlanyp, juqpaly aýrýlar aýrýhanasyna jetkiziledi.
– Biz maımyl sheshegin anyqtaý úshin dıagnostıka daıyndadyq. Bul – arnaıy tester. Olar osy aýrýdy anyqtaýǵa kómektesedi. Maımyl shesheginiń belgileri bar pasıentterdi tekseremiz, – dedi Ǵınıat úkimet kýlýarynda.
Mınıstrdiń aıtýynsha, Dúnıejúzilik densaýlyq saqtaý uıymy qazaqstandyqtardy osy aýrýǵa qarsy vaksınalaý týraly usynym bermegen. Sondyqtan bul másele kún tártibinde turǵan joq. Mınıstr maımyl sheshegi alǵash Afrıka elderinen taralǵanyn, qazir ol jaqta jaǵdaı ýshyǵyp turǵanyn jetkizdi.
– Qazaqstan azamattaryna aýrý kóp taraǵan elderge, ásirese, Afrıka elderine saıahat jasaýdy shegere turýǵa keńes beremin, – dedi ol.
Maımyl shesheginiń negizgi belgisi – denede bórtpe paıda bolady. Buǵan qosa, qyzý kóterilip, bas aýyrady, álsizdik seziledi.
Pikir qaldyrý