Májilis depýtattary Ǵalymjan Eleýov, Amanǵalı Berdalın «Qazaqtelekom» AQ Aqtóbe oblystyq fılıaly ujymymen kezdesti. Onda elimiz túbegeıli ózgeristerdiń aldynda turǵanyn aıtyp,  onyń negizgi qozǵaýshy kúshi — konstıtýsıalyq reformalar ekenin aıtty.

– Biz eńbek ujymdarymen medısına, mádenıet qyzmetkerlerimen jáne pedagogtarmen kezdesýdemiz. Maqsatymyz Konstıtýsıaǵa engiziletin ózgerister men tolyqtyrýlardy túsindirý. Aldaǵy konstıtýsıalyq reforma bılik tarmaqtary arasyndaǵy qarym-qatynas teńgerimin ońtaılandyrady. Halyqtyń eldi basqarýǵa qatysýyn keńeıtedi, azamattardyń konstıtýsıalyq quqyqtaryn qorǵaýdy kúsheıtedi. Bizdiń árqaısymyz osy múmkindikti paıdalanýymyz kerek, – dedi Ǵalymjan Eleýov.

Amanǵalı Berdalınniń pikirinshe osyndaı kezdesýlerden prezıdenttiń saıasaty men reformalaryna degen halyqtyń qoldaýy aıqyn kórinedi. Bul memlekettiń ádiletti Qazaqstan qurýdaǵy baǵytynyń durystyǵynyń jarqyn kórinisi.

– Konstıtýsıaǵa engiziletin ózgeristiń ishinde elimizdiń sýperprezıdenttik basqarýdan túbegeıli bas tartyp, prezıdenttik respýblıka modeline ótýi, barlyq partıalarǵa teń múmkindik ashylýy, demokratıalyq qoǵamnyń kúsheıýi, eldi jańa kezeńge ótýiniń kepili dep bilemin. Barlyq aqtóbelikterdi saıası naýqanǵa atsalysyp, daýys berýge shaqyramyn, – dedi Amanǵalı Berdalın.

«Qazaqtelekom» AQ Aqtóbe oblystyq fılıalynda qazirgi tańda 465 adam jumys jasaıdy. Úlken eńbek ujymy memleket basshysy Qasym-Jomart Toqaevtyń reformalaryn qoldaıtynyn aıtyp, saıası naýqannan úlken úmit kútetinin jetkizdi.

«AMANAT» partıasynyń Aqtóbe oblystyq fılıalynyń aqparaty boıynsha