Shyǵystyń esimi elge tanymal sportshylary, mádenıet jáne óner qaıratkerleri referendýmǵa belsendi qatysyp, ózderiniń azamattyq ustanymdaryn kórsetip jatyr.

Solardyń biri, Qazaqstannyń Eńbek sińirgen sport sheberi, halyqaralyq týrnırlerdiń birneshe dúrkin chempıony, «Qazaqstan barysy», «Álem barysy» ataqtarynyń ıegeri Aıbek Nuǵymarov Semeıdegi №178 ýchaskede daýys berdi.

– Osy referendýmnan keıin bizdiń elimizdi úlken ózgerister kútip tur. Men búgin óz tańdaýymdy jasadym. Adamdardyń ýchaskelerge kóterińki kóńil-kúımen baryp jatqany qýantty, - deıdi oblystyq máslıhat depýtaty, Semeı Kólik kolejiniń dırektory Aıbek Nuǵymarov.

Semeıde aýa-raıynyń qolaısyzdyǵyna qaramastan halyqtyń joǵary belsendiligi baıqalady. Qaladaǵy saılaý ýchaskelerinde Qazaqstannyń ataqty fýtbolshylary da óz tańdaýyn jasady.

– Biz Andreı Karpovıchtiń dostarynyń fýtbol merekesine Semeıge arnaıy kelgen edik. Búgin elimiz úshin aıtýly kún. Árbir azamat óziniń daýysy arqyly elimizde bolatyn ózgeristerge óz úlesin qosýǵa múmkindigi bar. Sondyqtan biz osy múmkindikti paıdalanyp, Semeıdegi saılaý ýchaskesinde daýys berdik, - dedi fýtboldan Qazaqstannyń úsh dúrkin chempıony Davıd Lorıa.

Sondaı-aq dańqty jerlesterimiz Samat Smaqov pen Andreı Karpovıch te saıası naýqannan tys qalmady.

– Keshe biz tamasha fýtbol merekesin ótkizdik. Naǵyz mereke boldy. Aýa-raıy men atmosfera keremet boldy. Barlyǵy óte kóńildi ótti. Búgin – tarıhı kún. Konstıtýsıaǵa engiziletin ózgeristerge árbir azamat óz úlesin qosa alady. Týǵan qalama kelip daýys bergenime qýanyshtymyn. Azamattyq ustanymnyń bolǵany óte mańyzdy, Men ne qalaıtynymdy bilemin jáne referendým bizge úlken múmkindikter syılaıtynyn túsinemin, - dep túıindedi oıyn ataqty fýtbolshy Andreı Karpovıch.

Búgin Altaı aýdanynda alǵash ret paýerlıftıngten sport sheberi, halyqaralyq, respýblıkalyq, oblystyq jarystardyń qatysýshysy Ámına Volchenko daýys berdi.

– Táýelsiz elimizdiń tarıhyna kóz júgirtsek, biraz jyldan keıin minekı referendým ótkizilip jatyr. Elimizdiń basty zańy retinde Konstıtýsıaǵa aıtarlyqtaı ózgerister men tolyqtyrýlar engiziletin bolady. Bul azamattarǵa óziniń azamattyq ustanymyn kórsetýge tamasha múmkindik, – deıdi esepteıdi Ámına.