Energetıka mınıstri Bolat Aqsholaqov atom elektr stansasy salynatyn oryndy naqtylady, dep habarlady QazAqparat aqparat agenttigi.

– Naqty oryn emes, ornalasatyn óńirge qatysty vedomstvoaralyq komısıa ótkizdik. Qalaı desek te, ol Balqash kóli mańynda ornalasady. Bul - Almaty oblysyndaǵy Úlken aýylynyń tóńiregi. AES salynatyn jerdi aıqyndadyq, – dedi Bolat Aqsholaqov prezıdent janyndaǵy Shetel ınvestorlary keńesiniń otyrysynan keıin.

Onyń aıtýynsha, atom elektr stansasy qurylysyna qatysty birqatar aspektini áli de zerdeleý qajet.

– Bıyl osy ýaqytqa deıin birneshe ret aıtqan núanstardy zerdeleý jumysyn júrgizý qajet. Olar geologıa jáne sýǵa baılanysty mán-jaılar. Osydan keıin naqty koordınattar belgili bolady. Sodan soń esepteýlerdi baılanystyramyz. Biraq esep júrgizý úshin tehnologıany aıqyndaý qajet. Tehnologıany kelesi jyly aıqyndaımyz, – dedi mınıstr.