Bilim jáne ǵylym mınıstrligi fýnksıalar men ókilettigi boıynsha ekige bólinip, Qazaqstanda jańa mınıstrlik paıda boldy.

Mektepke deıingi, orta, tehnıkalyq jáne kásiptik, orta bilimnen keıingi bilim berý, qosymsha bilim berý, balalardyń quqyqtaryn qorǵaý, mektepke deıingi, orta, tehnıkalyq jáne kásiptik, orta bilimnen keıingi bilim berý salasyndaǵy sapany qamtamasyz etý, mektepke deıingi, orta, tehnıkalyq jáne kásiptik bilim berýdi sıfrlandyrý salasyndaǵy fýnksıalar men ókilettikter shoǵyrlanyp, Oqý-aǵartý mınıstrligi quryldy.

Vedomstvony burynǵy Bilim jáne ǵylym mınıstri Asqat Aımaǵambetov basqarady.

Al joǵary jáne joǵary oqý ornynan keıingi bilim berý, til saıasaty, ǵylym, joǵary jáne joǵary oqý ornynan keıingi bilim berý men ǵylym salasyndaǵy sapany qamtamasyz etý, joǵary jáne joǵary oqý ornynan keıingi bilim berýdi sıfrlandyrý salasyndaǵy fýnksıalar men ókilettikter jınaqtalyp, Ǵylym jáne joǵary bilim mınıstrligi quryldy.

Jańa mınıstrlikti aqpan aıynda ǵana májilis depýtaty atanǵan Saıasat Nurbek basqarady.

Saıasat Nurbek 1981 jyly 18 mamyrda Semeı qalasynda dúnıege kelgen. Marshalltaýn kolejin (AQSH) saıasattaný mamandyǵy boıynsha, L.M.Gýmılev atyndaǵy ýnıversıtetti "Halyqaralyq quqyq" mamandyǵy boıynsha, La Sapıensa (Italıa) ýnıversıtetin geopolıtıka mamanyǵy, "Kókshe" akademıasyn psıhologıa mamandyǵy boıynsha bitirgen.

AQSH, Sıngapýr, Belgıa, Japonıa, Golandıada taǵylymdamadan jáne biliktilikti arttyrý kýrstarynan ótken.

Ár jyldary "Qazyna" turaqty damý qory" AQ ınvestısıalyq jobalar salasynda, prezıdent ákimshiliginde Samuryq-Qazyna" ulttyq ál-aýqat qorynda, Memlekettik saıasattyń ulttyq mektebinde, Bilim jáne ǵylym mınıstrligi Halyqaralyq baǵdarlamalar ortalyǵynda "Nur Otan" partıasynyń Qoǵamdyq Saıasat ınstıtýtynda,  Almaty qalasy ákimdigi ishki saıasat basqarmasynda, Astana Halyqaralyq Qarjy ortalyǵynda, BTS Education kompanıasynda basshylyq qyzmetter atqarǵan.