Áleýmettik jelide Máskeýde júrgen sýretteri tarap ketken eks-prezıdent Nursultan Nazarbaev Reseı prezıdenti Vladımır Pýtınmen kezdeskeni belgili boldy.
Elbasy saıty taratqan aqparattyq habarlamada Nursultan Nazarbaev Reseı prezıdentin eldiń ulttyq merekesi – Reseı kúnimen quttyqtaǵany aıtylady.
"Kezdesýde Qazaqstannyń Tuńǵysh prezıdenti men Reseı Federasıasynyń prezıdenti eki el arasynda qarym-qatynas ornaǵanyna 30 jyl tolýyna oraı bir-birine jyly lebizderin jetkizdi. Taraptar Qazaqstan men Reseı yntymaqtastyǵy teń dárejedegi dıalog negizinde damyp kele jatqanyn atap ótti. Nursultan Nazarbaev pen Vladımır Pýtın bir-birine myqty densaýlyq jáne amandyq tilep, aradaǵy dostyq baılanys aldaǵy ýaqytta da Qazaqstan men Reseı halyqtarynyń ıgiligi úshin jalǵasyn tabady degen senim bildirdi" delingen habarlamada.
Pikir qaldyrý