Bıyl 150 jyldyǵyn atap ótetin Ahmet Baıtursynulynyń kindik qany tamǵan úıiniń izi de qalmaǵan. Buǵan deıin irgetasy turǵan. Ahańnyń kózindeı sol berik irgetasty merdigerler buzyp tastap, ornyn tez úgitiletin taspen órgen, dep habarlady "Habar 24" telearnasy.
Telearna merdiger rsynyń ózinde istiń qıýyn keltirmeı, jurttyń ashýyn týǵyzǵan deıdi.
– Mynaý arada Ahmettiń burynǵy úıiniń izi bolǵan. Fýndamenti bunyń qara shymnan kesekten salynǵan edi. Mine, qarap otyrsańdar jobasy osy jerden. Mynaý arada peshpen bólingen edi. Sol peshpen bólingen buryshta bizdiń Ahmet atamyzdyń úıindegi ájemiz osy jerde Ahmet atamyzdy dúnıege ákeldi-aý dep ózimiz oılaıtyn edik. Astań-kesteńi shyqqan. İzi de qalmaǵan, dymy da qalmaǵan. Eń sońǵy Ahmettiń ózimizde bar eskertkishinen aıyrylyp qalyp turmyz, – deıdi Ahmet Baıtursynuly aýylynyń turǵyny Jaqsybek Ábdisalyq.
Jermen jeksen bolǵan aýmaqta byltyr eki bólmeli úı turǵan. Ult ustazy Sarytúbektegi osy baspanada dúnıege keldi, deıdi jurt. Ony eskertkish retinde turǵyndar 2009 jyly bastapqy keıpindegi irgetastyń ústinen salǵan.
Bıyl mamyr aıynda úı qaıta jańǵyrtylady dep sheshilgen. Tender jarıalanyp, merdiger jumysqa kirisken. Biraq 22 mln teńgeniń qurylysy orta jolda toqtap qaldy. Nysanda sapasyz materıaldar paıdalanǵany týraly vıdeolar áleýmettik jelige tarap, daý shyqty. Qabyrǵasyna degen qum bloktary kópke shydaýy ekitalaı edi. Jaýapsyz merdigermen kelisim eki jaqpen úzilgen.
Alaıda oblystyq mádenıet basqarmasynyń basshysy Erlan Qalmaqov súrilgen úı Baıtursynov týǵan úı emes dep otyr.
– Saman kirpishten qaıta quıylǵan úı. Bylaısha aıtqanda kóriksiz, zaman talabyna sáıkes kelmeıtin, ári qaraı qalpyna keltirýge múmkindigi joq úı bolatyn. Ol dál Ahmet Baıtursynulynyń týǵan úıi emes. Sonyń irgesiniń negizinde kóterilgen úı. Úlkenderdiń aıtýynsha, aýyl adamdarynyń aıtýy boıynsha qalanǵan úı. Sondyqtan biz ony bylaısha aıtqan kezde Ahmet Baıtursynovtyń týǵan úıi jer betinen ysyrylyp tastady deýge kelmeıdi. Tarıhı shyndyqqa janaspaıdy, – deıdi ol.
Qazir súrilgen aýmaq tegistelip jatyr. Jańa úıdiń qurylysy jobalanyp qoıǵan. Qyrkúıekke deıin salynyp bitýi tıis.
Jangeldın aýdany qurylys bóliminiń basshysy Ádilbek Imanǵalıev joba boıynsha 149 sharshy metr turǵyn úıdi mýzeı úı etip, qaıta qalpyna keltirý jumystary júrgizilmek.
Aqkól aýylynyń turǵyny Kádirjan endigi salatyn adam durystap salsa eken deıdi.
Pikir qaldyrý