UQK tóraǵasynyń burynǵy orynbasary Samat Ábish qylmystyq tergeý nysanasynda. Bul týraly komıtet tóraǵasynyń orynbasary Asqar Ámerhanov májilis kýlýarynda málim etti.
– Qazirgi tańda Samat Ábish tergeý orbıtasynda. Odan jaýap alynyp jatyr. Statýsyn dál bilmeımin. Ol Qazaqstanda. Ózin kórmedim. Biraq ol elde dep oılaımyn. Óıtkeni tergeý júrip jatyr, – dedi ol.
Samat Ábish qyzmetinen ketkeni týraly beıresmı aqparat alǵash 5 qańtarda shyqqan. Sonymen qatar Samat Ábish qamaýǵa alynǵany týraly áńgimeler tarady. Alaıda UQK aqparatty teristep, 14 qańtarda Samat Ábish qyzmetinde ekenin, jylsaıynǵy demalysynda júrgenin málim etken. Biraq ol jerde onyń demalysqa qashan shyqqany jazylmaǵan.
Komıtet aqparatynan keıin áleýmettik jelide Samat Ábishteı ulttyq qaýipsizdikke jaýapty organ basshysynyń birinshi orynbasary elde dúrbeleń bolyp jatqanda qalaı ǵana demalysta júredi dep jazýshylar bolǵan.
Artynsha, ulttyq qaýipsizdik komıteti Samat Ábishtiń demalysta ekeni týraly aqparatty tolyqtyryp, onyń demalysy 13 qańtardan bastalǵanyn jazdy.
Al 17 qańtarda onyń UQK-den ketkeni resmı habarlandy.
Samat Ábish Qazaqstannyń burynǵy prezıdenti Nursultan Nazarbaevtyń týǵan inisi Satybaldy Nazarbaevtyń balasy. Onyń UQK-de istegen aǵasy Qaırat Satybaldy qazir qamaýda otyr.
Pikir qaldyrý