Qazaqstan prezıdentinen áıelderdiń zeınet jasyn 58-ge deıin, qaraýynda erekshe balalary bar analardyń zeınet jasyn 55-ke deıin tómendetýdi suraǵan onlaın petısıa 821907 qol jınady. Onyń ishinde petısıany qoldap berilgen daýys – 818 myń 485, qarsy daýys – 3422.

Petısıa avtory 45 jastan bastap áıelder densaýlyǵynda túrli kinárat tabylatynyn, áıelder otbasyna kóńil bólip, beınettiń zeınetin kórgenin qalaıtynyn aıtady.

"Umytpańyz, árqaısymyzdyń anamyz bar" degen avtor petısıany múmkin bolǵan barlyq áleýmettik jeli men messendjerler arqyly taratýdy ótingen.

Buǵan deıin Úkimet azamattardyń keı kategorıalarynyń zeınet jasyn tómendetýdi qarastyratyny, másele jyl sońyna deıin belgili bolatyny habarlanǵan. Qazirgi ýaqytta áıelder úshin zeınet jasy  60-61 jas aralyǵynda.