Eldegi jáne álemdegi epıdemıologıalyq jaǵdaı turaqty bolǵanyna qaramastan, zertteýshiler revaksınasıa alý qajet ekenin aıtady, óıtkeni adam aǵzasyn vırýstan saqtandyrý úshin kúshti qorǵanys qajet. Bul týraly Sanıtarıalyq-epıdemıologıalyq baqylaý komıtetiniń resmı ókili Erjan Baıtanaev aıtty, dep habarlady Tengrinews.kz tilshisi.

"Alda aýrýdyń ósýi popýlásıadaǵy omıkron shtamynyń BA.4/VA.5 sýbvarıanttarymen taralýyna baılanysty bolýy múmkin, olar aldyńǵy túrlerine qaraǵanda, ımýnıtetti aınalyp ótý qasıetine ıe.

Sonymen qatar, aýrýdyń ózinen basqa, koronavırýstyń jańa nusqalary postkovıd sındromynyń damýyna ákelýi múmkin, bul jyldar boıy jaǵymsyz belgilerdiń jalǵasýyn, tipti múgedek bolyp qalý qaýpin tóndiredi", - dedi ol.

Onyń aıtýynsha, aýrý asqynǵan jaǵdaıda bul tıimdi qural bola alady.

"Revaksınasıa elimizde aýrýhanaǵa jatqyzýǵa qarsy tıimdi jáne aýrýdyń aýyr, asqynǵan jaǵdaılaryna qarsy 98,6 paıyz tıimdi bolady. Sonymen qatar, bul postkovıd sındromnan qorǵaýǵa múmkindik beredi.

Qazaqstan densaýlyq saqtaý mınıstrliginiń usynymdaryna sáıkes keıingi alynǵan ekpeden nemese aýyrǵannan keıin jarty jyl aralyǵymen qaıta vaksınasıalaýǵa bolady", - dedi Erjan Baıtanaev.

Ol qazir kóbinese vaksınalanbaǵan jáne bir jyl buryn ekpe alǵan, revaksınasıadan ótpegen adamdar vırýs juqtyryp jatqanyn aıtty.

"Biz barlyǵyn vaksına alýǵa jáne revaksınasıadan ótýge shaqyramyz. Sebebi aýrýdy toqtatýdyń jalǵyz joly – ujymdyq ımýnıtet. Kóptegen adam pandemıa aıaqtaldy dep oılaıdy, biz barlyq shekteýlerdi alyp tastadyq, bári bosańsyp, qaıta vaksına alýǵa barmaıdy. Biraq bul úlken qatelik. Biz ár adamdy jaǵdaıdy nasharlatpaý úshin sanaly túrde vaksınasıadan nemese revaksınasıadan ótýge shaqyramyz", - dedi sanepıdbaqylaý komıtetiniń resmı ókili.