Shyǵys Qazaqstanda oqýshylar jazǵy demalysta qazaq, orys jáne aǵylshyn tilderin oıyn túrinde úırene alatyn arnaıy baǵdarlama ázirlendi. Baǵdarlamanyń biregeıligi – onyń elde áli analogy joqtyǵynda. Ony qurýǵa tek til mamandary ǵana emes, sonymen qatar psıhologtar men tárbıeshiler de tartylǵan.
Oblystyq bilim basqarmasy mamandarynyń aıtýynsha, oqytý ádistemesi balalardyń jasyna jáne qyzyǵýshylyqtaryna sáıkes ázirlengen. Osy jyldyń shilde aıynan bastap balalardyń jazǵy demalysynyń barlyq alańdarynda (al bul 35 qala syrtyndaǵy, 475 mektep janyndaǵy lager, sondaı-aq 485 aýla klýby, úıirmeler men seksıalar) sabaqtar bastalady. Olardy májbúrsiz atmosfera men kommýnıkatıvtik oıyndar, pikir-saıys klýbtary, túrli baıqaýlar men vıktorınalar, shyǵarmashylyq sheberhanalar sekildi alýantúrli materıaldar tosyp tur. Sabaqqa tildi meńgergen volonter stýdentterdi tartý kózdelgen.
– Balalarynyń qazaq, orys jáne aǵylshyn tilderin aýyzeki deńgeıde bolsa da úırenýin qalaıtyn ata-analardan ótinishter jıi keledi, – dep atap ótti Shyǵys Qazaqstan oblysynyń ákimi Danıal Ahmetov baǵdarlamanyń tanystyrylymynda.
– Sabaqtardyń balalar úshin qoljetimdi formada bolýy mańyzdy. Óıtkeni ol jerlerde aýyzeki sóıleýge basa nazar aýdarylatyndyqtan, balalarda tildi meńgerýine múmkindik mol. Baǵdarlama 2025 jylǵa deıin eseptelgen, ony iske asyrýdyń alǵashqy nátıjeleri jazdyń sońynda belgili bolady, – dedi óńir basshysy.
Aıta ketý kerek, standartty emes nusqadaǵy testileý lager aýysymynyń basynda jáne sońynda ótedi, bul bilimniń ósý dınamıkasyn dál taldaýǵa múmkindik beredi.
Pikir qaldyrý